काठमाडौं – पाकिस्तानका भावी प्रधानमन्त्री इमरान खान अतिविलासी मर्सिडिज एस–६०० म्याबेकमा यात्रा गर्नेछन् । 

एक रिपोर्टअनुसार प्रधानमन्त्री निवासमा ६ वटा यस्ता गाडी पुगेका छन् । प्रत्येकको मूल्य २९ करोड रुपैयाँ छ । यो आधुनिक प्रविधिले युक्त छ । 

पाक ह्वील्सका अनुसार, यी कारहरूमा प्रधानमन्त्रीको सुरक्षाका लागि राम्रो व्यवस्था गरिएको छ । गाडी बमप्रूफ छ । प्रधानमन्त्री यी कारहरूमा पूर्ण सुरक्षित रहन्छन् । यसबाहेक बीएमडब्ल्यू एम–७६० पनि पाकिस्तानको प्रधानमन्त्री निवास पुगेको छ । 

मर्सिडिज एस–६०० म्याबेक एकदमै आरामदायी र विलासी गाडी हो र त्यसमा प्रशस्त ठाउँ छ । त्यसको म्याजिक बडी कन्ट्रोलले रोडको हिसाबले आफैं सस्पेन्सन सेट गर्छ । यसको सीटमा मसाज फंक्सनको पनि व्यवस्था छ । 

कारमा सानाठूला सबै सुविधा छन् र यो ससानो कोठैजस्तो लाग्छ । 

पाकिस्तानका प्रधानमन्त्री र राष्ट्रपति सन् २०१६ मा किनेका सशस्त्र गाडीका यिनै मोडल प्रयोग गर्छन् । 

इमरान खानले शनिवार पाकिस्तानी प्रधानमन्त्रीको शपथ लिने भएका छन् । सोमवार तल्लो सदनका ३३१ सदस्यले शपथ लिएका थिए ।

एजेन्सी