काठमाडौं – पेट्रोलियम पदार्थ ढुवानीमा अवरोध गरिरहेका ट्याङ्कर चालकविरुद्ध सरकार कडा रूपमा प्रस्तुत भएको छ ।

उद्योग, वाणिज्य तथा आपूर्ति मन्त्रालयले फौजदारी संहितामा असहमति जनाउँदै ढुवानी ठप्प पारेका ट्याङ्करको साँचो थुतेर चलाउन थालेको हो ।

गत बुधवारदेखि पेट्रोलियम पदार्थको ढुवानी रोकर आन्दोलनमा उत्रेका चालकहरूसँग मन्त्रालयले पटक-पटक वार्ता गरेको थियो । सहमति नजुटेपछि चालकहरूले ढुवानी सुचारु गरेनन् ।

सरकारले दिएको चेतावनी समेत अटेरी गरेपछि शुक्रवार बिहानदेखि मन्त्रालयले चाबी थुत्न शुरू गरेको आपूर्तिमन्त्री मातृका यादवका स्वकीय सचिव सन्तोष विष्टले लोकान्तरलाई जानकारी दिए ।

विष्टका अनुसार मन्त्रालयले अमलेखगञ्ज र भैरहवामा गरी ३० वटाभन्दा बढी ट्याङ्कर नियन्त्रणमा लिई चलाउन शुरू गरिसकेको छ ।

नेपाल प्रहरी र नेपाल आर्मीमा तालिमप्राप्त चालकहरूलाई लिएर मन्त्रालयले पेट्रोलियम पदार्थ ढुवानी गर्न शुरू गरेको छ ।

अहिले करीब साढे १८ सय ट्याङ्करहरूले पेट्रोलियम पदार्थ ढुवानी गरिरहेको छन् । यसमध्ये केहीले मात्रै शुक्रवार बिहानदेखि ढुवानी सुचारु गरेका छन् ।

तेलमा कोटा प्रणाली

यसैबीच सरकारले पेट्रोलियम पदार्थको विक्री वितरणमा कोटा तोकेको छ । ढुवानी आपूर्ति असहज भएको भन्दै सरकारले पेट्रोल, डिजेलको विक्री वितरणमा कोटा प्रणाली लागू गरेको हो । 

मोटरसाइकल, स्कूटरलाई पाँच लिटर, हल्का सवारी साधान कार, भ्यानलाई बढीमा १५ लिटर डिजेलबाट चल्ने सवारीलाई ५० लिटर र लामो दूरीका सवारीसाधनलाई १०० लिटर उपलव्ध गराउन निर्देशन दिएको छ । 

आयात रोकिएसँगै काठमाडौंसहित देशका मुख्य शहरी क्षेत्रमा सवारी साधनको लामो लाइन देखिएको छ । नाकाबन्दीको समयमा जस्तै सर्वसाधारण पम्पको अगाडि लाइनमा छन् । 

पेट्रोलियम पदार्थ ढुवानीको मुख्य नाका रक्सौलबाट असोज २ गतेदेखि इन्धन भित्रिन सकेको छैन । आयल निगमसँग इन्धन स्टक गर्ने क्षमता धेरै नहुँदा एक दुई दिनमानै राजधानीमा तेलको हाहाकार पर्न थालेको छ । तर निगमले भने धेरै नआत्तिन सर्वसाधारणलाई आग्रह गरेको छ । 

यसैक्रममा आपूर्ति मन्त्रालयले आन्दोलनमा उत्रिएका चालकको साँचो नियन्त्रणमा लिन थालेको हो ।