बलिउड जोडी दीपिका पादुकोण तथा रणवीर सिंह ६ वर्षको प्रेमपछि आज इटलीको लेक कोमोमा विवाह बन्धनमा बाँधिदै छन् । बलिउडका लागि यो वर्ष सबैभन्दा ठूलो विवाह उत्सव हो यो । यस भन्दा पहिला यसै वर्ष सोनम कपुर तथा आनन्द आहूजाले विवाह गरेका थिए । 

आज र भोली विवाह कार्यक्रम रहेको छ । हिजो कोंकणी समुदायको रिवाज अनुसार इन्गेजमेन्ट सकिएको छ । त्यस अवसरमा संगीत र मेहन्दी कार्यक्रम र नाचगान भव्य भएको भारतीय सञ्चारमाध्यमहरुले जनाएका छन् । 

आज राति विवाह

भारतीय समय अनुसार दीपिका–रणवीरको विवाह राति साढे ६ बजेदेखि साढे ९ बजेको बीचमा हुने छ । यो समय इटलीको विहानको समय हो । जन्तिका लागि पञ्जावी र इटालिन खानाको व्यवस्था गरिएको छ । 

विवाह मण्डप भव्य

विवाहलाई शानदार बनाउनका लागि विवाह मण्डपलाई भव्य रुपमा सजाइएको छ । खासगरेर मण्डप दीपिकाको इच्छा अनुसार र उनको मनपर्दो फूलबाट सजाइएको छ । त्यसमा वाटर लिली फूलको बढी मात्रामा प्रयोग भएको जनाइएको छ । 

रणवीरले गाए दीपिकाका लागि

संगीत तथा मेहन्दी कार्यक्रम हिजो निकै भव्य भएको थियो । पार्टीमा रणवीर सिंह मूडमा देखिएका थिए । रणवीर निकै उत्साही थिए भने दीपिका भावूक बनेकी थिइन् । जतिवेला दीपिका कार्यक्रममा सहभागी हुन आइन् तव रणवीरले फिल्म गुन्डेको गीत ‘तुने मारी इन्ट्री’ बोलको गीत गाएका थिए । यसका साथै उनले ‘ओ हसीना जुल्फो वाली’ पनि गाएका थिए । 

एक दिनको भाडा २४ लाख

रिपोर्टहरुका अनुसार जहाँ विवाह भइरहेको छ त्यस विलाशी होटलमा एक कोठाको न्यूनतम भाडा करिब ५२ हजार ८ सय नेपाली रुपैयाँ छ । यो कार्यक्रम हुने भवनमा ७५ कोठा रहेका छन् । यो हिसावमा दीपिका रणवीरले यसका लागि प्रत्येक दिन ३९ लाख ६० लाख भन्दा धेरै खर्च हुने छ । विवाहको लागि एक हप्ते कार्यक्रमका लागि २ करोड ७७ लाख २० हजार रुपैयाँ भाडामा मात्र खर्च हुने छ । 

को को छन् विवाहमा 

भारतीय सञ्चारमाध्यमहरुका अनुसार दीपिका रणवीरको विवाहमा निकै कम पाहुनालाई बोलाइएको छ । समाचारहरुका उनुसार विवाहमा करिब ३० जना नातेदार र साथीहरुलाई बोलाइएको छ । बलिउडबाट फराह खान, शाहरुख खान, सञ्जयलीला भन्सालीलाई मात्र बोलाइएको चर्चा भारतीय सञ्चारमाध्यमा छ । 

विवाहको तस्वीर सार्वजनिक नगर्न विशेष तयारी गरिएको छ । त्यसकारण विवाहमा जाने अतिथिलाई मोबाइल, क्यामरा लैजन प्रतिवन्ध लगाइएको छ ।