बुटवल – ५ नम्बर प्रदेशको हिउँदे अधिवेशन शुरू भएको छ ।

बजेट अधिवेशन सकिएको ४ महिनापछि प्रदेश सभाको हिउँदो अधिवेशन बुधबारदेखि शुरू भएको हो ।

अधिवेशनमा बोल्दै प्रदेशसभा सांसदले अधिवेशनलाई विधयेक निर्माणको अधिवेशन बनाउनुपर्ने बताएका छन् । उनीहरूले सत्तापक्ष प्रतिपक्ष नभनी हिउँदे अधिवेशनबाट धेरै विधेयक निर्माण गरी प्रदेशलाई गति दिनुपर्ने बताए । 

बैठकको शुरूमा बोल्दै नेकपाका सांसद भूमिश्वर ढकालले अधिवेशनबाट धेरैभन्दा धेरै विधयेक निर्माण गर्नुपर्ने बताए । ‘पहिलो र दोस्रो अधिवेशन सिकाइमा बित्यो । अब स्थानीय तह र प्रदेशका लागि आवश्यक विधयेक पास गरी प्रदेशलाई समृद्ध बनाउने दिशामा छिटो गरी लाग्नुपर्छ,’ उनले थपे, ‘सत्तापक्ष प्रतिपक्ष भन्ने अब नराखी सहमतिबाट विधयेक निर्माणमा जुट्नुपर्छ ।’ हिउँदे अधिवेशनलाई विधयेक अधिवेशनका रूपमा पनि लिइन्छ ।

नेकपा सांसद कृष्णध्वज खड्काले संसद कछुवा गतिमा चलेको भन्दै अबको अधिवेशन यस्तो बन्न नहुने बताए । विगतका अधिवेशनबाट पाठ सिक्दै विधयेक बनाउन जट्नुको विकल्प नभएको बताए । स्थानीय तहसँग पनि समन्वय गरेर कानून निर्माण गर्नुपर्ने धारणा राखे । 

नेकपाकै अर्का सांसद तुलाराम घर्तीमगरले प्रदेशसभाका सांसदहरू बेरोजगार तर मन्त्रीहरू कार्यक्रम उद्घाटनमै व्यस्त भएको भनेर जनताबाट आलोचना आउन थालेको भन्दै यसलाई रोक्नुपर्ने बताए । उनले भने, ‘हाम्रो कुनै भूमिका भएन । प्रदेशका मन्त्रीहरू स–साना कार्यक्रम उद्घाटनमा व्यस्त हुनुभयो । यसको जनताबाट आलोचना आउन थालेको छ । यो विषयमा सोच्नुपर्ने देखियो ।’

नेपाली कांग्रेसका सांसद डिल्ली चौधरीले २ वटा अधिवेशन आशलाग्दा नदेखिएको बताए । उनले भने, प्रदेश सरकारले सफल भए मात्र संघीयता सफल हुन्छ । सरकारले पूँजीगत खर्च भएको छैन । पूँजीगत खर्च बढाएर विकास केन्द्रित हुनुपर्छ ।’

संघीय समाजवादी फोरमका सांसद सन्तोष पाण्डेयले प्रदेश सरकारले केही गर्न नसकेको भन्दै आलोचना गरे । उनले भने, ‘सरकारले केही गर्न सकेन । अझै पनि केही बिग्रिएको छैन । संघको अधिकार प्रदेशमा ल्याउन सबै जुट्नुपर्छ ।’ 

सांसद गीता थापाले प्रदेश सभाले महिला मैत्री कानून निमार्ण गरी महिला हिंसा न्यूनीकरणका लागि ठोस कदम चाल्नुपर्ने बताइन । बुधबारको बैठकमा संसदहरू गीता थापा, इन्द्रप्रसाद खरेल, विष्णु पन्थी, कल्पना पाण्डे, रामजी घिमिरे, सरस्वती गौतम, कूलप्रसाद पोखरेल र भगवतीदेवी भण्डारीले धारणा राख्दै केन्द्रको मुख ताकेर बस्नुभन्दा पनि काम गर्न अगाडि बढ्नुपर्ने धारणा राखे । 

बैठकमा प्रदेश प्रमुख उमाकान्त झाबाट प्रदेश सभाको अधिवेशन आह्वान भएको पत्र र दोस्रो अधिवेशनबाट पारित भई प्रदेश प्रमुखबाट प्रमाणीकरण भएका विधेयकसम्बन्धी पत्र सभामुख पूर्णबहादुर घर्तीले पढेर सुनाएका थिए । 

प्रदेशका आन्तरिक मामिला तथा कानून मन्त्री कुलप्रसाद केसीले प्रदेश ५ जाँचबुझ आयोगको गठन तथा काम, कर्तब्य र अधिकारको सम्बन्धमा व्यवस्था गर्न बनेको विधेयक र प्रदेश ५ संघ संस्था दर्ता सम्बन्धमा व्यवस्था गर्न बनेको विधेयक बैठकमा पेश गरे । अर्को बैठक आउँदो पुस ८ गने दिउँसो १ बजे बस्नेछ ।