दिल्लीमा परराष्ट्रमन्त्री ज्ञवालीको पत्रकार सम्मेलन: ईपीजी प्रतिवेदन बुझ्न भारत सकारात्मक

पुस २७, २०७५

नयाँ दिल्ली – परराष्ट्र मन्त्री प्रदीप ज्ञवालीले नेपाल–भारत प्रबुद्ध समूहको प्रतिवेदन बुझ्नका लागि भारत सकारात्मक रहेको बताएका छन् । ईपीजीले गत जुलाइमै आफ्नो प्रतिवेदन तयार गरिसकेपनि भारतीय प्रधामनन्त्री नरेन्द्र मोदीले समय नदिँदा प्रतिवेदन बुझाउन सकेको छैन । 

राइसिना डायलगमा भाग लिन भारतको राजधानी नयाँ दिल्लीमा रहेका मन्त्री ज्ञवालीले शुक्रवार बिहान दूतावासमा आयोजित पत्रकार सम्मेलनमा ईपीजीको प्रतिवेदन बुझ्न भारत सरकार सकारात्मक रहेको बताएका हुन् । 


ADVERTISEMENT

मन्त्री ज्ञवालीले बिहीवार भारतीय विदेशमन्त्री सुष्मा स्वराजसँग भेटवार्ता गरेका थिए । स्वराजसँग हिजो भएको भेटवार्तामा समसामयिक विषय र इपीजीको प्रतिवेदन बुझाउने विषयमा समेत कुराकानी भएको थियो । 
स्वराजसँग व्यापार घाटा कम गर्नका लागि नेपाल तर्फबाट हुने चिया, कफी र अदुवाको निर्यात सहज बनाउन कुरा गरेको उनले बताए ।  

पढ्नुस् यो पनिः इपीजी प्रतिवेदनबारे भारतीय विदेशमन्त्रीलाई गलत ब्रिफिङ भएछ : परराष्ट्र मन्त्री ज्ञवाली [अन्तर्वार्ता]

ट्रम्प र किम मिल्छन् भने पाकिस्तानमा सार्क किन हुन सक्दैन ?

मन्त्री ज्ञवालीले अध्यक्ष राष्ट्रको हैसियतले सार्क सम्मेलन गर्न नेपाल सरकार सकारात्मक रहेको बताए । उनले निकट भविष्यमै सार्कको सम्मेलन हुने विश्वास व्यक्त गरे । ‘ट्रम्प र किम मिल्छन् भने पाकिस्तानमा सार्क सम्मेलन हुन किन सक्दैन ?’ उनले प्रतिप्रश्न गरे । 

सन् २०१९ मै सार्क सम्मेलन सम्पन्न होला भन्ने पत्रकारको प्रश्नमा मन्त्री ज्ञवालीले भने– ‘मिति नतोकौं, उपयुक्त समयमा हुन्छ ।’

भारतीय नोटमा आश्वस्त हुन चाह्यौं

नेपालले किन भारतीय २ सय ५ सय र २ हजारको नोटमा प्रतिबन्ध लगाएको भन्ने पत्रकारको प्रश्नमा मन्त्री ज्ञवालीले विगतमा जस्तो भविष्यमा नोटबन्दीको समस्या नआओस् भन्ने आश्वस्तताका लागि केही नोटमा प्रतिबन्ध लगाइएको बताए । यस विषयमा दुई देशका केन्द्रीय बैंकहरूबीच छलफल भइरहेकाले छिट्टै निकास निस्कने उनको विश्वास छ ।

सरकारले दुई हप्ता अगाडि केही भारतीय नोटमा प्रतिबन्ध लगाउने निर्णय गरेको थियो । पत्रकार सम्मेलनमा भारतीय सञ्चार माध्यमका पत्रकारहरूले यस विषयमा चासोपूर्वक प्रश्न सोधेका थिए । ‘भारतमा अर्को वर्षदेखि २ हजारको नोट नछाप्ने भन्ने सुनिएकाले पनि हामी थप आश्वस्त हुन चाहेका हौं,’ उनले भने । 

यसअघि भारतले गरेको नोटबन्दीका क्रममा नेपालमा रहेका भारतीय नोट सटही हुन सकेको छैन । 
 

पुस २७, २०७५ मा प्रकाशित

दिलिप भुसाल

भुसाल लोकान्तर डटकमका दिल्ली प्रतिनिधि हुन् ।

लेखकबाट थप...

प्रतिक्रिया दिनुहोस

ताजा समाचार