रमण कन्स्ट्रक्सन कालोसूचीमा, नयाँ ठेक्का प्रक्रियामा सहभागी हुनबाट रोक

साउन २१, २०७६

काठमाडौं – सरकारले जीआईटीसी रमण जेभी (रमण कन्स्ट्रक्सन)लाई नयाँ ठेक्का प्रक्रियामा सहभागी हुनबाट रोक लगाएको छ । सार्वजनकि खरिद अनुमगन कार्यालयले मंगलवार सूचना जारी गर्दै रमण कन्स्ट्रक्सनलाई नयाँ ठेक्का प्रक्रियामा सहभागी हुनबाट रोक लगाएको हो । 

हुलाकी सडक निर्देशनालयले रमण कन्स्ट्रक्सनलाई कालोसूचीमा राख्न सिफारिस गरेकाले आगामी दिनमा नयाँ ठेक्का प्रक्रियामा सहभागी हुन नपाउने गरी कालोसूचीमा राखेको जानकारी सार्वजनिक खरिद अनुमगन कार्यालयले दिएको छ ।


ADVERTISEMENT

हुलाकी सडक निर्देशनालयले रमण कन्स्ट्रक्सन र पप्पु कन्स्ट्रक्सनले निर्माणको जिम्मेवारी पाएको नारायणी पुल निर्माणको काम नगरेको भन्दै दुवै ठेकेदारलाई कालोसूचीमा राख्न खरिद अनुमगन कार्यालयलाई गत असार २० मा पत्राचार गरेको थियो ।

सोही पत्रको आधारमा सार्वजनिक खरिद अनुमगन कार्यालयले रमणलाई नयाँ ठेक्का प्रक्रियामा सहभागी हुन नपाउने गरी कालोसूचीमा राख्ने तयारी गरेको थियो ।

कालोसूचीमा राख्ने खरिद अनुमगन कार्यालयको कदमविरुद्ध सर्वोच्च अदालतमा रिट समेत परेको थियो । असार २३ गते सर्वोच्च अदालतले हुलाकी सडक निर्देशनालयको पत्र अनुसार रमण र पप्पु कन्स्ट्रक्सनलाई कालोसूचीमा नराख्न अन्तरिम आदेश दिएको थियो ।

त्यसपछि सर्वोच्च अदालतले गत साउन १५मा ‘असार २३ मा दिएको अन्तरकालीन आदेशलाई निरन्तरता दिनु नपर्ने’ भन्दै आदेश दिएकाले रमण र पप्पुलाई नयाँ ठेक्का प्रक्रियामा सहभागी हुनमा रोक लगाइएको सार्वजनिक खरिद अनुगमन कार्यालयका प्रवक्ता यज्ञराज कोइरालाले जानकारी दिए ।

त्यस्तै खरिद अनुमगन कार्यालयका शाखा अधिकृत कैलाश ठकुराठीले नारायणी पुल निर्माणको काम नगरेको भन्दै हुलाकी सडक निर्देशनालय टेकुले पठाएको पत्रको आधारमा ठेकेदारले नयाँ ठेक्का प्रक्रियामा सहभागी हुनमा रोक लगाइएको जानकारी दिए । हुलाकी सडक निर्देशनालयले रमण र पप्पु जेभी, जनकपुर ९, धनुषालाई कालोसूचीमा राख्न सार्वजनिक खरिद अनुगमन कार्यालयमा पत्राचार गरेको थियो ।

रमण कन्स्ट्रक्सन धरहरा निर्माणको ठेक्का पाएको ठेकेदार कम्पनी हो । धरहरा पुननिर्माणको काम समेत सन्तोषजनक छैन ।

सार्वजनिक खरिद नियमावली, २०६४ को नियम १४१ उपनियम (२) बमोजिम सो निर्माण व्यवसायीको कालोसूची सम्बन्धी कारवाही पक्रिया खरिद कार्यालयबाट टुङ्गो नलागेसम्म सार्वजनिक निकायको नयाँ खरिद कार्यमा भाग लिन नपाउने गरी रोक लागाइएको व्यहोरा सम्बन्धित सार्वजनिक निकायहरूको जानकारीका लागि यो सूचना प्रकाशित गरिएको छ,’ मंगलवार प्रकाशित सूचनामा उल्लेख गरिएको छ ।

साउन २१, २०७६ मा प्रकाशित

प्रेम चन्द

पत्रकार चन्द लोकान्तरका लागि आर्थिक तथा समसामयिक विषयमा रिपोर्टिङ गर्छन् । 

लेखकबाट थप...

प्रतिक्रिया दिनुहोस