कर्णाली प्रदेशका मुख्यमन्त्री महेन्द्रबहादुर शाहीले नागरिकको जीउधनको सुरक्षा गर्ने जिम्मा राज्यको भएको बताएका छन् ।

शुक्रबार कर्णाली प्रदेशका मुख्यमन्त्री शाहीले कर्णाली प्रदेशका सबै प्रमुख जिल्ला अधिकारीसँग भर्चुअल वैठकको आयोजना गरी नागरिकको जीउधनको सुरक्षा गर्ने दायित्व राज्यको भएको र जनताको जीउधनमा क्षति पुगेमा राज्यले जवाफ दिनुपर्ने बताए ।

‘कर्णालीमा वृद्धवृद्धा, दम तथा दीर्घरोगीहरुको संख्या धेरै रहेको छ,’ मुख्यमन्त्री शाहीले भने, ‘कोरोनाको लक्षण सहितको संक्रमण समुदायमा पुगेमा मृत्युदर बढ्न सक्छ । यसतर्फ सबैको ध्यान जान आवश्यक छ ।’

संक्रमण रोकथाम तथा नियन्त्रणका लागि प्रदेश सरकारले कर्णालीमा प्रवेश गर्नेहरुसँग अनिवार्य पीसीआर रिपोर्ट माग गर्ने निर्णय गरेको बताउदै निर्णयको कडाइपूर्वक कार्यान्वयन गराउन मुख्यमन्त्री शाहीले निर्देशन दिए ।

मेलापर्वको समय शुरु भएको बताउदै मुख्यमन्त्री शाहीले जिल्लामा कुनै पनि मेला, महोत्सव, भेला, तथा राजनीतिक भेला, वैठक र भिडभाड हुने गतिविधि पनि कडाईपुर्वक रोक्न निर्देशन दिए ।

जिल्ला विपद व्यवस्थापन केन्द्र (डिसिएमसी) वैठकवाट स्थानीय तह र प्रदेश सरकारसंग समन्वय गरेर हरेक नागरिकलाई अनिवार्य मास्क लगाउने व्यवस्था मिलाउनुपर्ने उनले बताए ।

प्रदेश सरकारले जिल्ला अस्पत्तालहरुमा अक्सीजन, कम्तीमा एउटा भेन्टीलेटर र ५ देखि ७ वटा आईसीयू वेड व्यवस्था गर्न लागेको जानकारी दिए ।

वर्षायामका कारण वाढी, पहिरोजस्ता प्राकृतिक विपदवाट क्षति बढेकोतर्फ चिन्ता व्यक्त गर्दै मुख्यमन्त्री शाहीले उद्धार, उपचार, राहत तथा पुनस्र्थापनाका कामलाई प्रभावकारी वनाउन प्रमुख जिल्ला अधिकारीहरुलाई निर्देशन दिए ।

समन्वयको अभावले विपद पश्चात उद्धार र उपचारको काम प्रभावकारी नभएको तर्फ ध्यानाकर्षण गराउदै मुख्यमन्त्री शाहीले विपदले पुर्याएको क्षति तथा घाईतेहरुको अवस्थाका वारेमा तत्काल रिपोर्टीङ्ग गर्नुपर्नेमा जोड दिए ।