मधेश प्रदेशका मुख्यमन्त्री लालबाबु राउतले संस्कृति र साहित्यको संरक्षणमा प्रदेश सरकार प्रतिबद्ध रहेको बताएका छन् ।

तेस्रो संस्करणको ‘नबिल बैंक जनकपुर साहित्य महोत्सव २०२२’को बिहीवार जनकपुरधाममा उद्घाटन गर्दै मुख्यमन्त्री राउतले भाषा, संस्कृति र साहित्यको संरक्षण संवद्र्धन गर्नु सरकारको दायित्व भएकाले प्रदेश सरकार गम्भीर रहेको बताए ।

‘संस्कृति र साहित्यको संरक्षणमा प्रदेश सरकार प्रतिबद्ध छ,’ मुख्यमन्त्री राउतले भने, ‘सबै भाषा, संस्कृति र साहित्यको संरक्षण संवद्र्धनका लागि हामी प्रतिबद्ध छौं ।’

संस्कृति र साहित्यको संरक्षणका लागि हुने हरेक कार्यमा प्रदेश सरकारले सक्दो सहयोग गर्ने उनको प्रतिबद्धता थियो ।

मिथिला फाउन्डेसन नेपालको आयोजनामा शुरू भएको महोत्सव फागुन २१ गतेसम्म चल्ने आयोजकले जनाएको छ ।