मेक्सिकन नागरिक ड्यानिल तपियाको कासा म्याक्सिकना नामको रेस्टुरेन्ट खोलेका छन् । उनको रेस्टुरेन्ट काठमाडौंको गैरीधारा र ललितपुरको बखुन्डोलमा अवस्थित छ । 

म्याक्सिकन भाषामा कासाको अर्थ चुल्हो भन्ने बुझिन्छ । दुवै आउटलेटमा उनले टिपिकल म्याक्सिकन खानाको परिकार मेनुमा समावेश गरेका छन् ।

मेक्सिकन खाना पिरो, अमिलो र चिजी हुने हुँदा धेरै नेपालीलाई मन पर्छ ।

ड्यानिल तपिया नेपालमा सपरिवार बस्छन् र राम्रो नेपाली भाषा बोल्छन् । नेपाली कसरी सिक्नुभयो भन्ने प्रश्नमा ड्यानिलले स्टुरेन्टमा नेपाली कर्मचारीहरूसँग बोल्दाबोल्दै सिकेको बताए ।

म्याक्सिकन खानाको माग देखेर नै नेपाल आएर म्याक्सिकन रेस्टुरेन्ट खोलेको उनले बताए । म्याक्सिकन खाना म्याक्सिकनले बनाउनु र अरुले बनाउनुमा फरक पर्ने हुँदा किचनलाई उनी पूर्ण निगरानीमा राख्छन् ।

खानाको मौलिकता बिग्रेला र स्वादमा कमी होला भन्ने चिन्ताले उनले प्रायः सबै कर्मचारीलाई आफ्नो देशको खानाबारे तालिम दिने गरेका छन् । बढीजसो म्याक्सिकन खाना रोल हुने हुँदा सिक्न पनि खासै गाह्रो त हुन्न तर मसला र ताजापनका लागि सामाग्री जुटाउन अलि गाह्रो छ । 

हुन त उनले धादिङमा थोरै जग्गा किनेर आलोपेनो (मेक्सिकन खुर्सानी), सिल्यान्ट्रो (मेक्दिकन धनियाँ) खेती गरेका छन् । 

के–के खान पाइन्छ कासा म्याक्सिकनामा ?

टोटोपोस, गोकामोले, फिस्टाप्लाटर, चिप्स एन्ड साल्सा, चिलाकिलेस, रजस, पपस, टिङ्ग, सुप्रिमा, कार्निटास, इन्चिलाडास, टाकोस, बुरिटो, मोलेटेस, पिकोडेगालो, टोरटास, टोर्टा अहोगडो, टोर्टो चिलाकिल, टोर्टिला सुप जस्ता मेक्सिकन मौलिक खानाहरू कासा मेक्सिकानामा पाइन्छन् । 

मेक्सिकन खानाहरू ताजा, चिजिर अमिलो पिरो मात्र होइन, कलरफूल हुने हुँदा यसको लोकप्रियता विश्वभर छ ।