निर्माण घोषणा भएको लामो समयसम्म छायाङ्कनमा जान नसकेको चलचित्र ‘सत्यम’को शीर्ष गीतको लिरिकल भिडियो सार्वजनिक गरिएको छ ।

चलचित्र निर्माण हुने निश्चित भएको जानकारी दिलाउन र चलचित्रको माहोल तयार पार्न निर्माण टिमले मंगलवार साँझ लिरिकल भिडियो सार्वजनिक गरेको हो । 

रेशम सापकोटाको शब्द रहेको गीतमा राजु महर्जनले स्वर दिएका छन् भने गीतमा कुटुम्ब ब्याण्डको संगीत, योगेश काजीको संगीत कन्सेप्ट रहेको छ । 

भिडियोमा अभिनेता राजेश हमाललाई मात्रै फिचर्ड गराइएको छ । गीतमा अभिनेता राजेशकै स्वरमा केही संवादहरू समेत समावेश गरिएको छ । 

राम्रो इन्टरटेनमेन्टको अफिसियल युट्युब च्यानलमार्फत सार्वजनिक लिरिकल गीतको भिडियोलाई राकेश दाहालले सम्पादन गरेका हुन् । 

चलचित्रका मुख्य अभिनेतामध्येका पल शाह कारागार चलान भएपछि निर्माण टिम छायाङ्कनमा जान सकेको छैन ।  निर्माता रेशम सापकोटाले पल शाहको घटनाको छानबिन निष्कर्षमा नपुगेसम्म यो चलचित्रको छायांकन प्रारम्भ गर्न कठिन रहेको प्रतिक्रिया दिए ।

उनले बजारमा चलेको हल्ला अनुसार चलचित्र निर्माणबाट आफू पछि नहटेको समेत स्पष्ट पारे । ‘हामीले चलचित्र घोषणा गरिसकेपछि दर्शकलाई यसबारे कुनैपनि कन्टेन्ट दिन सकेनौ भन्ने महशुस भयो । सोही कारण यसको शिर्ष गीतको लिरिकल भिडियो सार्वजनिक गरेका हौं,’ निर्माता सापकोटाले भने, ‘चलचित्रका लागि दर्शकको पर्खाइ अरु थप बढ्ने पक्का भएपछि यो गीत सार्वजनिक गरेका हौं ।’

निर्माता सापकोटाले यस गीतमा कसैको नाम नराखेको र छिट्टै पत्रकार सम्मेलनमार्फत सम्पूर्ण जानकारी गराउने समेत बताए । उनले भने,‘प्रि–प्रोडक्सनको काम लगभग सकिएको छ । यसमा केही सदस्य हेरफेर हुन पनि सक्छ । हामीले भिडियोमा टिमका म बाहेक अरु सदस्यको नाम नराख्नुमा आफ्नै कारण छ ।’

प्रि–प्रोडक्सनको सम्पूर्ण काम सकेको यो चलचित्रमा अभिनेता राजेश हमाल, पल शाह, अनुप विक्रम शाही, उपासना सिंह ठकुरी लगायतका कलाकारको अभिनय रहने निर्माण टिमले यसअघि नै जानकारी गराइसकेको छ ।

भिडियो