देशकै प्रमुख पर्यटकीय गन्तव्य पोखरामा रंगको माध्यमबाट एकआपसमा खुशी साटासाट गर्ने पर्व फागु पूर्णिमा सोमवार हर्षोल्लासका साथ मनाइएको छ ।

पोखरा बजारसहित पर्यटकीय गन्तव्य लेकसाइड क्षेत्रमा स्वदेशीसहित विदेशी पर्यटकले समेत एकआपसमा विभिन्न रंग तथा अबिर दलेर होलीमा रमाएका छन् ।

पोखरा घुम्न आएका पर्यटकले एकआपसमा रंग दलेर शुभकामना आदानप्रदान गरी होली मनाएका हुन् । पोखरामा विभिन्न संघसंस्थाले समेत सामूहिक होली मनाएका छन् । 

नेपाल पत्रकार महासंघ कास्की शाखाले महासंघको भवनमा होली मिलन कार्यक्रम गरेको थियो । सञ्चारकर्मीहरूले रंग दलेर शुभकामना आदानप्रदान गरी होली मनाएका छन् । पोखराको पृथ्वीनारायण क्याम्पसमा विभिन्न विद्यार्थी संगठनले समेत सामूहिक होली मनाए ।

पर्यटकीय क्षेत्र लेकसाइडको हल्लनचोकदेखि डिहीकोपाटनसम्मको तीन किमी क्षेत्रमा पर्यटकले रंग लगाउँदै र नाच्दै गाउँदै होलीको रमाइलो गरे । फेवाताल किनारमा समेत होली मनाउनेहरूको संख्या उत्तिकै थियो ।

पर्यटकहरू ‘ह्याप्पी होली’ भन्दै रंग लगाएर खुशी साटासाट गरिरहेका थिए । आन्तरिक पर्यटकसहित भारतीय र तेस्रो मुलुकबाट घुम्न आएका पर्यटकहरू होलीमा सहभागी भएका हुन् ।

फागु पूर्णिमाका अवसरमा रेस्टुरेन्ट एन्ड बार एशोसिएशन (रेवान) पोखराले होली महोत्सवको आयोजना गरेको थियो । महोत्सवमा विभिन्न सांगीतिक कार्यक्रम आयोजना गरिएको थियो । पर्यटकहरू महोत्सवमा रमाएका थिए । 

स्वदेशी तथा विदेशी पर्यटकहरूलाई सहभागी गराई नेपालको संस्कृति र पर्वका बारेमा जानकारी गराउँदै एकआपसमा मित्रता र सद्भाव साटासाट गरी आन्तरिक तथा बाह्य पर्यटन प्रवर्द्धन गर्ने उद्देश्यले महोत्सव आयोजना गरिएको रेवान पोखराका महासचिव विकास भट्टराईले बताए ।