प्रहरी निरीक्षक युवराज कटुवालमाथि बन्चरो प्रहार

सवारी चेकजाँचमा खटिएका इलाका प्रहरी कार्यालय झिलझिलेका प्रहरी निरीक्षक युवराज कटुवालमाथि बन्चरो प्रहार भएको छ । ब्राउन सुगरले लठ्ठिएका एक युवाले उनलाई  बन्चरो प्रहार गरेका हुन् । 

बिहीबार साँझ ७ तिर  पूर्वपश्चिम राजमार्गको झरना खोला नजिकै प्रहरी निरीक्षक कटुवाल र सहायक प्रहरी निरीक्षक ड्युटीमा रहेका बेलातीन जना चढेको एउटा मोटरसाइकललाई रोकेर सोधपुछ गर्दैगर्दा ३६ वर्षीय अशोक पोखरेलले लुकाएर ल्याएको बन्चरो निकालेर कटुवाललाई टाउको र हातमा  बन्चरो प्रहार गरेको प्रहरीले जनाएको छ । 

टाउको र हातमा चोट लागेका घाइते प्रहरी निरीक्षक कटुवाललाई बीएन्डसी हस्पिटलमा उपचारका लागि पठाइएको प्रहरी उपरीक्षक दुर्गाराज रेग्मीले जानकारी दिए  ।

घाइतेको टाउकोमा ८ टाँका र हातको औलामा ३ टाँका लगाइएको छ । प्रहरीले मे४प २७५१ नम्बरको मोटरसाइकल र मोटरसाइकल चालक ३२ वर्षीय अरुण तामाङ, मोटरसाइकलको बीचमा बसेका ३३ वर्षीय लक्ष्मण टुडु र बन्चरो हान्ने ३६ वर्षीय अशोक पोखरेललाई नियन्त्रणमा लिएर आवश्यक अनुसन्धान अघि बढाएको जनाएको छ । उनीहरूको साथ बाट ब्राउन सुगर समेत नियन्त्रणमा लिएको छ ।