सिन्धुपाल्चोककी २२ वर्षीय नोमु शेर्पा बिहीबार प्रहरीकोमा पुगिन् । उनीसँगै थिए गाउँका २ दाजुभाइ र काका । उनी काठमाडौंको नयाँ बानेश्वरस्थित उपत्यका अपराध अनुसन्धान कार्यालय पुग्दा अन्य ६०० भेला भइसकेका थिए । 

उनीहरूको पीडा लगभग एउटै थियो– विदेश पठाई दिन्छु भन्दै दलालले पैसा खाइदियो । उनीहरूलाई आफूलाई क्रोसिया पठाउँछु भन्दै ठगी गर्ने व्यक्तिलाई हेर्न र फसेको पैसा फिर्ता पाउने आशामा प्रहरीकोमा पुगेका थिए । 

यही वर्ष कक्षा १२ सकेर बसेकी नोमुले क्रोसिया जान दलाललाई पैसा दिएकी थिइन् । उनी र उनका दाजुभाइसहित प्रत्येक व्यक्तिहरूले २/२ लाखका दरले पैसा बुझाएको बताए । 

पहिला ५० हजार रुपैयाँ चाहिने बताएपछि उनले दिइन् । ‘पहिला ओर्क प्रमिट ल्याउन ५० हजार चाहिन्छ भन्यो र दियौं । वर्क परमिट आयो भनेपछि कार्तिक १ लाख ५० हजार गरेर २/२ लाख दिएका छौं,’ शेर्पाले लोकान्तरसँग भनिन्, ‘पुसमा त ऊ भाग्यो । अनि ठगिएको थाहा पाएका हौं ।’ 

ठगिएको थाहा पाएपछि उनीहरूले प्रहरीमा उजुरी दिएका थिए । ठगिने उनी मात्र होइनन् । गोरखा भिमसेन थापा गाउँपालिका–२ का एक युवा पनि ठगिए । 

क्रोसिया जान ६ लाख रुपैयाँ लाग्ने उनले पनि दुई लाख बुझाएका रहेछन् । उनले साउन महिनामा ५० हजार र असोज महिनामा १ लाख रुपैयाँ दिएको बताए । 

धादिङका केशवबहादुर तामाङ पनि १ लाख ५० हजार ठगिएको पैसा उठ्ने आशमा अपराध अनुसन्धान कार्यालय आएका थिए । ‘५/६ महिनामा क्रोसियामा उठाउँछु । अर्जेन्ट डिमान्ड आएको छ भन्नुभयो  । २ लाख पैसा मागेका थिए, तर मैले १ लाख हाल्दिएको थिएँ । कार्तिक महिनामा प्रोसेसका लागि भनेर ५० हजार दिएको हुँ,’  तामाङले लोकान्तरसँग भने ।

उनले आफूलाई दलालले बालाजुमा रहेको अफिस पनि देखाएको बताए । दलालले आएको भनेको वर्क परमिट पनि फेक भएको थाहा पाएपछि प्रहरीमा उजुरी दिएको उनले बताए । यी त एक/दुई जना प्रतिनिधि पात्रहरू हुन् । यस्ता ६१५ जनाको करिब ६० करोडभन्दा धेरै ठगी गरेको अभियोगमा अपराध अनुसन्धान कार्यालयले ३२ वर्षीय विकास वाइवा भन्ने सुजन तामाङलाई पक्राउ गरेर सार्वजनिक गरेको छ । प्रहरीले बिहीबार  सार्वजनिक गरेका तामाङसँग २ वटा नागरिकता छन् । प्रहरीका काभ्रेको कन्जोसोम गाउँपालिका–४ घर भएका सुजन तामाङले २०७७ सालमा ठगी गरेर फरार भएपछि च्यासिङ्गखर्क–३ बाट विकास वाइवाको नामबाट अर्को नागरिकता लिएका थिए । 

उनले सुजनको नामबाट ३२ करोड रुपैयाँ ठगी गरेका छन् भने विकासको नामबाट ३६ करोडभन्दा धेरै ठगी गरेका छन् । ‘दुई वटा नामबाट ७० करोड रुपैयाँ ठगी गरेको देखिन्छ,’ अनुसन्धानमा खटिएका एक अधिकारीले लोकान्तरसँग भने । 

उनको अपराध यात्रा भने २०७३ सालबाट शुरू भएको प्रहरी अधिकारीहरू बताउँछन् । त्योबेला उनी आयुश मेनपावरमा एजेन्टको रूपमा काम गर्दै आएका थिए । प्रहरीका अनुसार ५ वर्ष ऐजेन्टको काम गरेपछि विभिन्न व्यक्तिहरूलाई विदेश पठाउने भन्दै ठग्न थालेका हुन् । उनी २०७७ सालमा दुबई, कतार र मलेसिया पठाउने भन्दै ठगी गरेर भारतमा बसेका थिए । 

त्यसपछि उनी विकास वाइवाको नामको नागरिकता बनाएर नेपालमा बस्दै आएको प्रहरीले जनाएको छ । उनले त्यही नाममा बालाजुमा मेन पावर खोलेको अपराध अनुसन्धान कार्यालयका प्रमुख एसएसपी सोमेन्द्र सिँह राठोरले बताए । ‘उनले अर्को नाममा नागरिकता लिएपछि नेपाल आएर फेरि मेनपावर खोलेको देखिन्छ,’ एसएसपी राठोरले भने । उनले २०८० वैशाखमा विकास वाइवाको नामा यूरो विङ्गस् ऐडुकेशन कसन्सल्टेन्सी खोलेर ठगी धन्दा सञ्चालन गर्दै आएका थिए । 

उनले वैशाखयता मात्रै क्रोसिया पठाउने भन्दै ६१५ जनाबाट ५० हजारदेखि ५ लाखसम्म ठगी गरेको अनुसन्धानमा देखिएको एसएसपी राठोरले बताए । उनले माल्टामा ८ लाख, पोल्याण्डमा ७ लाख, क्रोसियामा ६ लाख ५० हजार र क्यानडामा जान १८ लाख रुपैयाँ लाग्ने भन्दै ठगी गरेको पाइएको छ । 

प्रहरीका अनुसार उनले ठगी गरेको पैसाबाट ४ करोड ऋण तिरेका छन् । ३५ लाखको हुण्डाइको कार खरिद गरेका छन् । उनका भाइ सुवाश तामाङको खातामा १५ लाख ५० हजार जम्मा गरेको भेटिएको छ । बसुन्धारामा रहेका राप्ती मेनपावरमा ५० लाख (५० प्रतिशत शेयर) लगानी गरेका छन् । 

उनले ५ लाखको सुनको ब्रास्लेट किनेको समेत अनुसन्धानमा देखिएको एसएसपी राठोरले बताए । प्रहरीले उनका मार्केटिङ एजेन्ट नुवाकोट किस्पाङ गाउँपालिका–१ का ३२ वर्षीय अर्जुन तामाङ भन्ने कर्म तामाङलाई पनि पक्राउ गरेको छ ।  प्रहरीका अनुसार कर्मले सुजन नभएको अवस्थामा पैसा बुझ्ने गरेका थिए । उनीविरुद्ध पनि वैदेशिक रोजगार विभागमा उजुरी परेको छ । उनीसँग पनि प्रहरीले केटा गाडी बरामद गरेको छ ।