गृह मन्त्रालयले कसैले सार्वजनिक जग्गा अतिक्रमण गरेर निजी रुपमा दर्ता गरेको पाइएको भए सरकारलाई जानकारी दिन सर्वसाधारणलाई अनुरोध गरेको छ ।

गृहका प्रवक्ता सहसचिव नारायणप्रसाद भट्टराईले बिहीवार विज्ञप्ति जारी गर्दै यस्तो अनुरोध गरेका हुन् ।

सार्वजनिक जग्गा अतिक्रमण गर्नेविरुद्ध कारबाही प्रक्रिया अघि बढाउनका लागि सम्बन्धित सरोकारवाला निकायसँग समन्वय गर्न सबै जिल्ला प्रशासन कार्यालयलाई पत्राचार गरिएको जानकारी दिँदै गृहले यस्तो अनुरोध गरेको हो ।

अतिक्रमण भएका जग्गा फिर्ता ल्याउने तथा गैरकानूनी रुपमा जग्गा अतिक्रमण वा कब्जा गर्ने व्यक्तिलाई प्रचलित कानूनबमोजिम कारबाही गर्ने कार्यलाई सरकारले प्राथमिकता साथ अघि बढाएसँगै यस्तो अनुरोध गरिएको गृहले जनाएको छ ।

‘कसैको निजी हक दर्ता भोगचलनमा रहेको बाहेकको सार्वजनिक एवं सरकारी स्वामित्व रहेको ऐलानी, सन्धिसर्पन, गौचरन, घाट आदि जग्गाहरू कानूनविपरीत कसैले आफ्नो नाममा दर्ता गरेको वा खास उद्देश्य वा प्रयोजनका लागि कुनै संस्थाको भोगचलन वा नियन्त्रणमा रहने गरी सुम्पेको वा जिम्मा दिएका सार्वजनिक र सरकारी जग्गाहरू बलजफ्ती अतिक्रमण गरेको भए त्यस्तो कार्य गर्नेउपर प्रचलित कानूनबमोजिम कारबाही प्रक्रिया अघि बढाउनका लागि सम्बन्धित सरोकारवाला निकायसँग समन्वय गर्न सबै जिल्ला प्रशासन कार्यालयलाई पत्राचार गरिएको छ,’ विज्ञप्तिमा उल्लेख छ, ‘सार्वजनिक जग्गा दुरुपयोग गरी दर्ता स्रेष्ता कायम गर्ने गरी निर्णय गरेको र सोका आधारमा बिक्री वितरण गरेको, भोगाधिकार सिर्जना गरेको, धितो बन्धक राखेको आदि जुनसुकै प्रकारको गैरकानूनी काम कारबाहीसम्बन्धी आफूसँग भएको सूचना वा प्रमाण सम्बन्धित जिल्ला प्रशासन कार्यालयमा जानकारी दिनुहुन सम्बन्धित सबैमा अनुरोध छ ।’

पछिल्लो समय उपप्रधान तथा गृहमन्त्री नारायणकाजी श्रेष्ठले सरकारी जग्गा अतिक्रमण गर्नेविरुद्ध कडा कदम चालिरहेका छन् । यसबीचमा गृहले अतिक्रमित जग्गाबारे जानकारी दिन सबैलाई अनुरोध गरेको हो ।