नाबालिकालाई वेश्यावृत्तिमा लगाएको आरोपमा खाजाघर सञ्चालक पक्राउ परेका छन् । 

पक्राउ पर्नेमा काठमाडौं महानगरपालिका–१६ बालाजुस्थित ‘लाफा’ नामक खाजा घरका सञ्चालक उदयपुरका २३ वर्षीय नवीनकुमार मगर छन् । उनलाई नेपाल प्रहरीको मानव बेचबिखन अनुसन्धान ब्यूरोले पक्राउ गरी आज सार्वजनिक गरेको हो ।

प्रहरीका अनुसार उनले उक्त खाजाघरमा १३ वर्षीया बालिकालाई वेश्यावृत्तिमा लगाएका थिए ।

बालिकालाई फागुनदेखि डर र प्रलोभनमा पारेर वेश्यावृत्तिमा लगाउने गरेको खुलेको ब्यूरोका प्रहरी उपरीक्षक ज्ञानेन्द्रप्रसाद फुँयालले जानकारी दिए ।

'खाजा घरमा डरमा पारी राखेको अवस्थामा बालिकालाई उद्धार गरेर मगरलाई पक्राउ गरेका हौं', उनले भने ।

प्रहरीले पक्राउ मगरलाई मानव बेचबिखन तथा ओसारपसार मुद्दामा काठमाडौं जिल्ला अदालतबाट पाँच दिनको म्याद थप गरी अनुसन्धान गरिरहेको प्रहरी उपरीक्षक फुँयालले बताए ।