इंडियन प्रिमियर लिग (आईपीएल) मा दिल्ली क्यापिटल्सविरुद्ध कोलकत्ता नाइट राइडर्सले फराकिलो जीत दर्ता गरेको छ । गएराति सम्पन्न खेलमा कोलकत्ताले दिल्लीमाथि १०६ रनको फराकिलो जीत दर्ता गरेको हो । 

टस जितेर पहिले ब्याटिङ रोजेको कोलकत्ताले निर्धारित २० ओभरमा ७ विकेट गुमाएर २७२ रनको विशाल योगफल खडा गरेको थियो । यो आईपीएल इतिहासको दोस्रो ठूलो योगफलसमेत हो । केही दिनअघि मुम्बई इण्डियन्सविरुद्ध हैदराबादले २७७ रन बनाएको थियो ।

कोलकत्ताका लागि सुनिल नरिनले ३९ बलमा सर्वाधिक ८५ रन बनाए । यस्तै अनकृष रघुवंशीले २७ बलमा ५४ रनको अर्धशतकीय इनिङ खेले । आन्द्रे रसेलले १९ बलमा ४१ रन बनाए भने रिङ्कु सिंहले ८ बलमा २६ रन बनाए ।

दिल्लीका एनरिक नोर्ट्जेले ४ ओभरमा ५९ रन खर्चिदै ३ विकेट लिए । यस्तै ईशान्त शर्माले २ तथा खलिल अहमद र मिचेल मार्शले समान १-१ विकेट लिए ।

जवाफमा दिल्लीले १७.२ ओभरमा सबै विकेट गुमाउँदै १६६ रन मात्र बनाउन सक्यो । दिल्लीका लागि कप्तान ऋषभ पन्तले २५ बलमा ५५ रन बनाए । यस्तै ट्रिस्टन स्टब्सले ५४ रन जोडे । अन्य ब्याटरले भने सम्झनलायक प्रदर्शन गर्न सकेनन् ।