सन्दीप लामिछानेविरुद्धको मुद्दामा उच्च अदालत पाटनले पीडित गौशाला-२६ ले जन्म दर्ताको प्रमाणपत्र प्राप्त गर्नको लागि दिएको निवेदनको सक्कल प्रति माग गरेको छ।

न्यायाधीश मुनेन्द्रप्रसाद अवस्थी र दुर्गाप्रसाद ढुंगेलको इजलासले सोमवार उक्त आदेश गरेको हो ।

उक्त  प्रमाणपत्र तादी गाउँपालिका-२ बाट मगाउन आदेश गरेको छ ।

‘उक्त जन्मदर्ता प्रमाणपत्रको प्रतिलिपि प्राप्त गर्नको लागि दिएको निवेदनको सक्कलै प्रति एवं जन्मदर्ता प्रमाणपत्रको स्पष्ट बुझिने प्रति तादी गाउँपालिका वडा नं. २ को कार्यालयबाट अविलम्ब माग गरी नियमानुसार पेश गर्नुहोला,’ आदेशमा उल्लेख छ।

सन्दीपले २०७९ भदौ ५ गते गौशालाको होटलमा लगेर जबरजस्तीकरणी गरेको भन्दै भदौ २१ गते एक किशोरीले प्रहरी वृत्त गौशालामा किटानी जाहेरी दिएकी थिइन् ।

जाहेरी पर्दा लामिछाने क्यारेबियन प्रिमियर लिग (सीपीएल) खेल्न जमैका पुगेका थिए ।

त्यसपछि असोज २० गते नेपाल फर्किएका सन्दीपलाई प्रहरीले विमानस्थलबाटै पक्राउ गरेको थियो ।

शुरूमा काठमाडौं जिल्ला अदालतबाट पुर्पक्षका लागि थुनामा पठाइएका लामिछाने उच्च अदालत पाटनबाट धरौटीमा रिहा भएका थिए ।

उच्च अदालतले विदेश जान रोक लगाएकोमा सर्वोच्च अदालतले क्रिकेट खेल्न अनुमति लिएर विदेशसमेत जान सक्ने आदेश गरेको थियो ।

मुद्दाको अन्तिम सुनुवाइ गर्दै जिल्ला अदालत काठमाडौंले पुस १३ गते सन्दीपलाई दोषी ठहर गरेको थियो ।

बलात्कार मुद्दामा दोषी ठहर भएका क्रिकेटर लामिछानेलाई ८ वर्ष कैद र ३ लाख जरिवाना तथा २ लाख रुपैयाँ क्षतिपूर्तिसमेत गरी कुल ५ लाख रुपैयाँ भराउने फैसला भएको छ ।

त्यसविरुद्ध उनी उच्च अदालत पुगेका थिए ।