सशस्त्र प्रहरीले २३ किलो चरेशसहित एक जनालाई पक्राउ गरेको छ । बर्दियाको भारतीय सीमाबाट करिब २३ किलो चरेशजस्तो पदार्थसहित एक जनालाई पक्राउ गरिएको सशस्त्रका सहप्रवक्ता डीएसपी शैलेन्द्र थापाले जानकारी दिए । 

पक्राउ पर्नेमा रुकुम पश्चिमको सानोभेरी गाउँपालिका-५ स्थायी वतन भएका ३४ वर्षीय बमबहादुर पुन रहेको उनले बताए । उनलाई मंगलबार बिहान पौने ४ बजे बर्दियाको बढैयाताल गाउँपालिका-२ फुटाहास्थित सीमाबाट सशस्त्र प्रहरी बल नेपाल बोर्डर आउट पोस्ट (बीओपी) फुटाहा बर्दियाको टोलीले पक्राउ गरेको हो । 

इलाकामा  शंकास्पद गतिविधि गरिरहेका उनलाई जाँच गर्दा दुई वटा झोलाबाट प्लास्टिकले बेरेको ३९ वटा प्याकेटमा  रहेको करिब २३ किलो  लागुऔषध चरेशजस्तो देखिने पदार्थ बरामद गरिएको थापाले बताए । 

उनलाई बरामद सामानसहित थप अनुसन्धानको लागि सम्बन्धित निकायमा बुझाइएको थापाको भनाइ छ ।