बझाङ प्रदेशसभा १ मा  मतपेटिका संकलनको कार्य जारी रहेको छ ।  मतपेटिका संकलन सकिएपछि सर्वदलीय बैठक बस्ने र दिउँसोसम्ममा मतगणना सुरु गर्ने तयारी रहेको सहायक निर्वाचन अधिकृत प्रकाशबहादुर सिंहले जानकारी दिए । 

उनकाअनुसार साइपाल गाउँपालिकाको दुई वटा मतदान केन्द्रमा खसालिएको मतपेटिका भौगोलिक कठिनाइका कारण मतगणनास्थल ल्याउन समस्या भएका कारण मतगणनामा ढिलाइ भएको हो । 

उनका अनुसार ती मतपेटिका लिन अहिले बिहान हेलिकप्टर पठाइएको छ । ‘साइपाल गाउँपालिका–३ को काडा मावि र वडा नं. ५ को सामुदायिक भवन मतदान केन्द्रको मतपेटिका लिन हेलिकप्टर पठाएका छौँ,’ उनले भने, ‘मतपेटिका आइपुगेपछि सर्वदलीय बैठक बस्ने तयारी छ । त्यसपछि मतगणना सुरु हुन्छ ।’

६१ हजार ७ सय ४८ जना मतदाता रहेको बझाङमा झण्डै ५० प्रतिशत मत खसेको थियो । उपनिर्वाचनमा ११ जना उम्मेदवार प्रतिस्पर्धामा छन् ।