पश्चिम नवलपरासीमा चट्याङ लागेर १ जनाको मृत्यु

पश्चिम नवलपरासीमा चट्याङ लागेर एक महिलाको मृत्यु भएको छ ।

जिल्लाको सुस्ता गाउँपालिका–५ स्थित तरैनी बस्ने २९ वर्षीय पुनम कोइरीको चट्याङ लागेर मृत्यु भएको इलाका प्रहरी कार्यालय बेलाटारीले जनाएको छ ।

मङ्गलबार बिहान ११ बजे चलेको हुरीबतासको समयमा उनी बगैँचातिर गएको समयमा चट्याङ लागेको प्रहरी निरीक्षक श्यामप्रकाश यादवले बताए ।

गाउँभन्दा बाहिरको आँपको रुखमुनि उहाँको शव सोही दिन अपरान्ह फेला परेको हो ।

उनका दुई छोरा र एक छोरी छन् ।

मृतकका श्रीमान् वैदेशिक रोजगारीको सिलसिलामा साउदी अरबमा रहेका स्थानीयले बताएका छन् ।