काठमाडौं – गोल गर्ने र त्यसपछि सेलिब्रेसन गर्ने कुरामा नै फूटबलको आकर्षण लुकेको छ । अझ ठूला प्रतियोगितामा गोल गरेपछि खेलाडीहरू कुनै न कुनै सन्देश दिइरहेका हुन्छन् । 

अहिले चलिरहेको विश्वकपमा पनि त्यही देखियो । यहाँ हामी केही खेलाडीको सेलिब्रेसनको चर्चा गर्दैछौं । 

रोनाल्डो

पहिलो म्याचअघि रोनाल्डोले दाह्री काट्दा चिउँडोमा अलिकति रौं बाँकी रह्यो । त्यसपछि उनले साथी कारेस्मालाई मजाकमै स्पेनविरुद्ध गोल गरेमा बाँकी रौं नकाट्ने भनेका थिए । हुन पनि रोनाल्डोले त्यसमा तीन गोल गरे । गोल गरेपछि उनले आफ्नो दाह्रीतर्फ इशारा गरे र यसलाई बोको अर्थात् गोट (ग्रेटेस्ट अफ अल टाइम, सर्वकालीन महान्) भन्ने व्याख्या पनि गरियो । तर वास्तवमा यो उनको लकी चार्म थियो । 

मेस्सी

लियोनेल मेस्सीको जिन्दगीमा उनकी हजुरआमाको ठूलो भूमिका छ । उनले नै मेस्सीलाई फूटबल खेल्न प्रेरित गरिन् र हरेक कदममा साथ दिइन् । मेस्सी आफ्ना सबै गोल दिवंगत हजुरआमालाई समर्पण गर्छन् र आकाशतिर दुवै हातका चोर औंला ठड्याउँछन् । 

ग्रीजम्यान

फ्रान्सका आत्वाँ ग्रीजम्यान भिडियो गेमका प्रशंसक हुन् र गेममा टेक द एल (अंग्रेजी अक्षर L) भन्ने शब्दावली धेरै लोकप्रिय छ । अर्जेन्टिनाविरुद्ध गोल गरेपछि उनलै त्यही L संकेत बनाएर सेलिब्रेट गरेका थिए । 

एम्बाप्पे

फ्रान्सकै किलियन एम्बाप्पे सानोमा आफ्नो दाजुसँग फूटबल खेल्दा गोल गरेपछि आफ्ना दुवै हात कसेर बाँध्दै सेलिब्रेट गर्थे । उनले विश्वकपमा पनि त्यसरी नै सेलिब्रेट गरे । 

ज्युबा

रुसका अर्टेम ज्युबा साउदी अरबविरुद्धको खेलमा ७०औं मिनेटमा मैदानमा प्रवेश गरे अनि ६० सेकेन्डमा गोल गरे । टीमका व्यवस्थापक चेर्चेशोभ यसबाट धेरै प्रभावित भए र उनले ज्युबालाई सलाम गरे । ज्युबाले इजिप्ट र स्पेनविरुद्ध गोल गरेपछि चेर्चेशोभलाई अभिवादन गरे ।

एजेन्सी