काठमाडौं – स्वास्थ्य राज्यमन्त्री सुरेन्द्र यादवले आगामी वर्षभित्रमा स्थानीय तहका सबै वडामा स्वास्थ्य संस्था स्थापना सम्पन्न हुने बताएका छन् ।

विश्व मानसिक स्वास्थ्य दिवसको पूर्वसन्ध्यामा मन्त्रालयमा आयोजित कार्यक्रममा स्वास्थ्य राज्यमन्त्री यादवले जनताको प्राथमिक स्वास्थ्य उपचारको अधिकार स्थापित गर्न देशका सबै वडामा स्वास्थ्य संस्था स्थापना गरिने बताए ।

‘स्थानीय तहका २२ सय वडामध्ये १२ सय वडामा पहिलो चरणमा स्वास्थ्य संस्था निर्माणको लागि कार्य भइरहेको छ,’ स्वास्थ्य राज्यमन्त्री यादवले भने, ‘अर्को वर्षमा स्वास्थ्य संस्था बिनाको कुनै वडा हुँदैन ।’
राज्यमन्त्री यादवले मानसिक स्वास्थ्यलाई सरकारले उच्च प्राथमिकतामा राखेको भन्दै मानसिक स्वास्थ्य सेवा प्रदान गर्नको लागि आवश्यक छलफल भइरहेको बताए । 

कार्यक्रममा स्वास्थ्य सेवा विभागका मानसिक स्वास्थ्य शाखाका मनोचिकित्सक डा. वासुदेव कार्कीले मानसिक स्वास्थ्य समस्या समाधानका लागि नेपालमा भएका नीति तथा कार्यक्रमको विषयमा जानकारी दिएका थिए । 

मानसिक स्वास्थ्यलाई नेपालको संविधानमा मौलिक हकमा राखिएकाले मानसिक स्वास्थ्य समस्याको विषयमा सरकारले विभिन्न कार्यक्रम गर्ने कार्कीले बताए । सडक तथा कारागारमा भएका मानसिक रोगीको लागि समेत कार्यक्रम ल्याउने तयारी भएको जानकारी दिए ।