जाजरकोटको रामीडाँडालाई केन्द्रबिन्दु बनाएर गएराति गएको ६.४ म्याग्निच्यूडको भूकम्पका कारण धनजनको ठूलो क्षति भएको छ ।

नेपाल प्रहरीले दिएको तथ्यांकअनुसार १२९ जनाको मृत्यु भइसकेको छ भने १४० जना घाइते छन् ।

भत्किएका घरहरूमा पुगेर उद्धारको काम बाँकी नै रहेकाले मृतक र घाइतेको संख्या अझै बढ्न सक्ने देखिएको छ ।

भूकम्पको इपिसेन्टर रहेको जाजरकोटको नलगाड नगरपालिकास्थित दल्लीमा रहेको नगर अस्पतालमा घाइतेहरूलाई उपचारका लागि भर्ना गारिएको  छ । तर, सीमित स्रोत साधन र सीमित जनशक्तिका कारण निकै समस्या भएको अस्पतालका इन्चार्ज राजेश सिंहले बताएका छन् ।

उनका अनुसार ४२ जना घाइतेहरू उक्त अस्पतालमा उपचाररत छन् । तीमध्ये ५ जनाको अवस्था गम्भीर रहेको सिंहले बताए । उनीहरूलाई थप उपचारका लागि थाप्लेस्थित अस्पतालमा रिफर गर्ने तयारी भइरहेको सिंहले बताए ।

'अस्पतालमा ल्याइएकालाई हामीले प्राथमिक उपचार दिएर जसोतसो टिकाएका छौं । केही घाइतेको स्वास्थ्य अवस्थामा सुधार पनि आएको छ,' अस्पतालका इञ्चार्ज सिंहले लोकान्तरसँग भने, 'हामीसँग भएको अक्सिजन पनि सिद्धिन थाल्यो । अब थप बिरामीलाई दिने अक्सिजन छैन ।'

सीमित भौतिक संरचना रहेको अस्पतालमा बेडको समेत अभाव रहेको उनले बताए ।

'अब थप घाइते वा बिरामी भर्न गर्न बेड छैन । कुनै स्कूललाई नै तत्काल अस्पतालको रूपमा प्रयोग गर्नुपर्ला,' सिंहले थपे, 'हामीलाई दक्ष स्वास्थ्यकर्मीको समेत अभाव भएको छ ।'

उक्त अस्पतालमा एकजना मात्र एमबीबीएस चिकित्सक छन् । २६ जना स्वास्थ्यकर्मीले मिलेर रातिदेखि नै उपचार गरिरहेको उनले बताए ।

अस्पताल ल्याउँदै गर्दा मृत्यु भएका ६ जनाको शव पनि सोही अस्पतालमा राखिएको छ ।