वैदेशिक रोजगार विभागको नयाँ योजना–दूतावासमै ‘रि इन्ट्री’को व्यवस्था

बैशाख २, २०७५

काठमाडौं, २ चैत– वैदेशिक रोजगारको क्षेत्रमा देखिएका समस्याहरुलाई नीतिगत तहबाटै हल गर्न वैदेशिक रोजगार विभागले श्रम मन्त्रालयमा नयाँ कार्ययोजना पेश गरेको छ । 

उक्त कार्ययोजनालाई मन्त्रालयले स्वीकृत गरेर त्यहि अनुसार लागू भए वैदेशिक रोजगारमा देखिएका समस्याहरु मध्ये आधा भन्दा बढी समस्याको समाधान हुने वैदेशिक रोजगार विभागका निर्देशक शशीकुमार लम्सालले लोकान्तरलाई बताए । 


ADVERTISEMENT

कार्ययोजनामा वैदेशिक रोजगारका अनाधिकृत र कामविहीन शाखाहरु बन्द गराउन प्रस्ताव गरिएको निर्देशक लम्सालले बताए । उनका अनुसार सूचना प्रविधिमार्फत विदेशमा रहेका नेपाली कुटनैतिक निकायहरु र नेपालको गृहमन्त्रालय बीच आवश्यक समन्वय गर्ने व्यवस्था गरिएको छ । 

प्रदेशहरुमा वैदेशिक रोजगार विभागको शाखा बिस्तार गर्ने तयारी  गरिएको छ । कार्ययोजना अनुसार प्रदेश नम्बर छ र सातको लागि एउटा शाखा खोल्ने, प्रदेश नम्बर तीनको लागि केन्द्रीय विभाग नै रहेने र बाँकी चार प्रदेशमा एक–एक वटा शाखा खोलेर सेवा प्रवाहलाई चुस्त र दुरुस्त बनाउने कार्ययोजनामा उल्लेख गरिएको छ । 

कार्ययोजनामा वैदेशिक रोजगारीमा गएर छुट्टीमा आउनेहरुले नेपाल आउनु भन्दा पहिला सम्बन्धित देशमा रहेको नेपाली दूतावासमै ‘रिइन्ट्री’ गर्न सक्ने प्रावधान राखिएको छ । 

श्रम कार्यालय ताहाचलमा ‘डिस्प्ले मोनिटर’ सहितको टोकन प्रणाली लागू गराउने, श्रम कार्यालयले हालसम्मको तथ्यांक अद्यावधिक गरेर सफ्टवेयर प्रणाली मार्फत अध्यागमन विभागसँग आवद्ध गर्ने र वैदेशिक रोजगारमा जाने र फर्कनेहरूको पूर्ण विवरण राख्नको लागि नयाँ कम्प्युटरीकृत व्यवस्था ल्याउने विषय प्रस्तावित कार्ययोजनामा समेटिएको छ । 

त्यस्तै, वास्तविक म्यानपावर एजेन्टहरुको विवरण संकलन गर्ने र कोही अनाधिकृत एजेन्ट भेटिए कारवाही गर्ने योजना रोजगार विभागको छ । दर्ता भएका म्यानपावर कम्पनिलाई कडाइका साथ् अनुगमन गर्ने र नियम मिचेर काम गर्नेलाई सहजै कारवाही हुने प्रावधान प्रस्तावित कार्ययोजनामा उल्लेख गरिएको छ । 

बैशाख २, २०७५ मा प्रकाशित

ईश्वर अर्याल

अर्याल लोकान्तरका लागि राजनीति, समसामयिक घटनाक्रम र वैदेशिक रोजगारीमा कलम चलाउँछन् ।

लेखकबाट थप...

प्रतिक्रिया दिनुहोस

ताजा समाचार