विराटनगर– सुनसरीको बर्जु गाउँपालिका– २ रामगंज बेलगछिया राजटोलमा बारुलाले टोकर उपचार गर्न आएका एक बालकको विराटनगरस्थित नोबेल मेडिकल कलेज (शिक्षण अस्पताल) मा ज्यान गएको छ । 

मंगलवार साँझ बारुलाले टोकेपछि उपचारको लागि बिराटनगरमा रहेको कोशी अञ्चल अस्पतालमा भर्ना गरिएकोमा बारुलाको बिष निकाल्ने प्रबिधि नभएको भन्दै कोशीले अन्यत्र रेफर गरेको थियो । हिजो साँझै नोबेल अस्पताल पुगेका हजुरबुबा ७५ बर्षका रामदेव राय र डेढ बर्षका नाती रिशब रायको नोबेल अस्पतालमा उपचार शुरु गरिएको थियो । उपचारका क्रममा हजुबुवा र नातीलाई अस्पतालले एकै खालको औषधि प्रयोग गर्दा रिशवको ज्यान गएको मृतकका बुबा जितेन्द्र रायको भनाइ छ । 

‘मंगलवार साँझ ५ बजे कोशी अस्पतालमा ल्याइएकोमा बारुलाले टेकेको बिष निकाल्ने प्रबिधि नभएपछि कोशीले रेफर गरेको थियो,’ जितेन्द्र रायले भने, ‘बिरामी दुबैलाई एउटै खालको औषधि लगाउँदा छोराको मृत्यु भयो ।’

नोबेल अस्पतालले रेफर नोट भन्दै मरेको बच्चालाई पठाएको बाबु रायको आरोप छ ।  रेफर नोट भनेर लेखिदिएको तर त्यो बेलासम्म बच्चाको मृत्यु भइसकेको उनको भनाइ छ । मृतक बालकको शव अहिले कोशी अञ्चल अस्पतालको शवगृहमा राखिएको छ । तर शवको पोस्टमार्टमको लागि प्रक्रिया अगाडी समेत नबढाइएको उनको भनाइ छ । 

मृतकमा आफन्तहरुले शवको पोस्टमार्टमका लागि पहल गर्न जिल्ला प्रशान कार्यालय र जिल्ला प्रशान कार्यालय पुगेका थिए । प्रशासन र प्रहरीले कुनै पहल नगरेपपछि पीडितहरु १ नम्बर प्रदेशको सामाजिक विकास मन्त्रालयमा पुगेका थिए । 

सामाजिक विकास मन्त्रालयले मोरङका प्रमुख जिल्ला अधिकारी रमेश केसीलाई पोस्टमार्टमको बिषयमा जानकारी लिँदा अस्पताल भित्रको बिषयमा पोस्टमार्टम नहुने प्रतिक्रिया दिएको सामाजिक विकास मन्त्रालय श्रोतले बताएको छ । 

कोशी अञ्चल अस्पतालका मेडिकल सुपरिटेण्डेट रोशन पोखरेलले पोस्टमार्टमको बिषय प्रहरीसँग जोडिएकोले केही भन्न नमिल्ने बताए ।  तर प्रहरीले भने यो बिषयमा पोस्टमार्टम गनेै नसक्ने बताएको छ । 

जिल्ला प्रहरी कार्यालय मोरङका प्रमुख प्रहरी उपरीक्षक मनोजकुमार केसीले पोस्टमार्टम ‘पुलिस केस’मा मात्र हुने बताए ।  उनले हस्पिटलमा मरेका मान्छेहरुको पोस्टमार्टम हुनै नसक्ने दावी गरे । शंकास्पद मृत्यु जस्तो, डुबेर, विष सेवन गरेर, झुण्डिएर हुने मृत्युमा पोस्टमार्टम हुने भए पनि अन्य अस्पतालमा भएको मृत्युको बिषय छानबिन समिति बनाएर अगाडी बढ्न सकिने उनको भनाइ छ । 

तर मृतकका आफन्तहरुले भने शवको पोस्टमार्टम गर्नुपर्ने माग राख्दै मंगलवार दिनभरी १ नम्बर प्रदशको सामाजिक विकास मन्त्रालय घेराउ गरेका थिए ।