काठमाडौं — ब्राजिली सुपरस्टार खेलाडी नेयमार पेरिस सेन्ट जर्मान क्लबमा नबस्ने मनस्थिति बनाइरहेका छन् । 

पेरिसी क्लबलाई यूईएफएले फाइनान्सियल फेयर प्लेमा लगाउन सक्ने जरिवाना अनि च्याम्पियन्स लीगमा क्लब नकआउट चरणमा नपुग्ने सम्भावना देखेका नेयमार त्यहाँ बस्न नचाहेका हुन् । 

क्लबमा बसिरहेर आफ्नो करीयर उँभो नलाग्ने आँकलन नेयमारले गरेका छन् । 

उनी रियाल मड्रिड क्लब जान चाहन्छन् । पेरिसको क्लबबाट निस्कनका लागि रियालले नै पैसा तिर्न सक्ने हैसियत राख्ने उनलाई थाहा छ । त्यसो त नेयमार बार्सिलोना नै पनि फर्किन चाहन्छन् तर बार्साले उनलाई फेरि लिने मन बनाएको देखिँदैन । 

तर रियाल मड्रिडमा नेयमारलाई सर्जिओ रामोस पटक्कै मन पर्दैनन् । रामोससँग खेल्नका लागि नेयमार इच्छुक छैनन् । अनि रियालमा रामोसको ठूलो प्रभाव छ । 

हालै अर्जेन्टिनाका पूर्वखेलाडी तथा रियालका पूर्वव्यवस्थापक जोर्गे भाल्दानोले रामोसको खुबै प्रशंसा गरेका छन् । रियाल क्लब आफ्नै स्वामित्वको हो झैं गरी रामोसले क्लबको जीतका लागि सबैखालको प्रयास गर्ने गरेको भाल्दानोले बताए ।

नेयमारलाई रामोसको यही गुण चित्त बुझ्दैन । रामोसको अत्यधिक प्रभाव तथा लगावका कारण क्लबमा उनीसँग झगडा पर्न सक्ने नेयमारको आँकलन छ । 

आफू रियाल मड्रिड आउने हो भने रामोसलाई बिदा गर्नुपर्ने नेयमारको भनाइ छ । 

क्लबका अध्यक्ष फ्लोरेन्टिनो पेरेजलाई रामोस र नेयमारबीच कसलाई छान्ने भन्ने विषयमा तनाव भएको छ । रोनाल्डोलाई बेचेपछि क्लबलाई गोलको वर्षा गर्नसक्ने एउटा खेलाडी जरूरी भइसकेको छ र नेयमार त्यसका लागि उपयुक्त पात्र हुन् ।

तर रामोसलाई क्लबबाट हटाउने कल्पना पनि गर्न सक्ने स्थिति छैन ।

डोन बलोनबाट