काठमाडौं — वृद्ध हुँदै गएपछि मानिसहरू जागिरबाट रिटायर भएर आराम गर्न मन पराउँछन् । तर एक वृद्ध जोडीले चाहिँ यो उमेरमा संसार घुम्ने निर्णय लिएको छ । 

उनीहरूले बाँचुन्जेल घुमिरहने योजना बनाएका छन् । 

अमेरिकाको सियाटलमा बस्ने माइकल र डेब्बी अहिलेसम्म संसारभरिका २५० शहर घुमिसकेका छन् । उनीहरू अझै धेरै यात्रा गर्ने सुरमा छन् । 

सन् २०१३ बाट उनीहरूले यात्रा शुरू गरेका हुन् । उनीहरू खर्च जुटाउन आफ्नो घर, कार र डुंगा समेत बेचे । 

आफू जहाँ बसिन्छ त्यही आफ्नो घर भएको उनीहरूको मान्यता छ । एयरबीएन्डबीबाट उनीहरू गेस्टहाउस बूक गर्छन् । 

यो जोडीले सिनियर नोमाड्स नााक ब्लग पनि चलाउने गरेको छ । 

आफूहरूलाई छोरीले संसार घुम्ने सल्लाह दिएको डेब्बी बताउँछिन् । संसार घुम्ने पैसा जुटाउन नसकिएला भनी पीर मानेको जोडीलाई छोरीले मानिसको घरमा पेइङ गेस्ट बनेर बस्न सल्लाह दिइन् । 

यात्रामा सामान नकिन्ने गरेको जोडी बताउँछ । उनीहरू अर्काका लागि उपहार चाहिँ किन्छन् । घुम्न गएको ठाउँमा उनीहरू सित्तैमा घुम्न पाइने ठाउँ मात्र जान्छन् । 

अनि उनीहरू खाना पनि आफैं बनाउँछन् । पाँच वर्ष घुम्दा पनि आफूहरू नथाकेको उनीहरूको भनाइ छ । 

आफूहरू पैदल हिँड्ने गरेकाले स्वस्थ रहेको उनीहरू बताउँछन् । 

एजेन्सी