बुटवल– सम्पूर्ण क्रिकेट खेलबाट भर्खरै सन्यास लिएका क्रिकेटर शक्ति गौचनले आप्ना दिवंगत पिताको सम्झनामा ‘स्वर्गीय खड्ग प्रसाद गौचन मेमोरियल कप अन्तर विद्यालय क्रिकेट प्रतियोगिता’ गर्ने भएका छन् । स्टार क्रिकेट ऐकेडेमी ओमसतिया, रूपन्देहीले प्रतियोगिता गर्न लागेको हो । गौचन ऐकेडेमीका प्रबन्धक हुन् । 

विद्यालयस्तरबाट खेलकुदको विकास गर्ने उद्देश्यले गौचनले प्रतियोगिता आयोजना गरिएको बुधबार बुटवलमा पत्रकार सम्मेलन गरी जानकारी दिए । प्रतियोगिता यही माघ १४ गतेदेखि शुरु हुनेछ । प्रतियोगितामा कम्तीमा १६ टिमको सहभागिता हुने गौचनले जानकारी दिए । 

‘मेरो क्रिकेटको विकासको लागि बुवाले ठूलो योगदान गर्नुभयो । मैले पनि उहाँका सम्झनामा केही गर्नुपर्छ भनेर प्रतियोगिता राखेको हुँ,’ गौचनले भने । ४० ओभरमा खेलाइने खेलमा १६ वर्षसम्मका विद्यार्थीहरू मात्र सहभागी हुन पाउनेछन् । प्रतियोगिता कर्मनडाँडा पडसरी र सितलनगर देवदहमा खेलाइने छ । 

प्रतियोगिताका सेमिफाइनल र फाइनल खेल सिद्धार्थ रंगशाला भैरहवामा खेलाइने छ । प्रतियोगितामा विजेता टिमलाई आकर्षक पुरस्कार राखिएको छ । प्रतियोगितामा ‘रेड बल हवाइट ड्रेस’को प्रयोग हुनेछ ।

कार्यक्रममा अन्रतर्राष्ट्रिय अम्पायर सञ्जय गुरूङले विद्यालय तहबाटै नेपालमा क्रिकेटको विकास हुन जरूरी रहेको बताए । गौचनले मंसिर३० गतेदेखि सम्पूर्ण क्रिकेट खेलबाट सन्यास लिएका थिए ।