काठमाडौं– घूस प्रकरणमा मुछिएका अख्तियार दुरुपयोग अनुसन्धान आयोगका आयुक्त राजनारायण पाठकले राजीनामा दिने तयारी गरेका छन् । घूस प्रकरणको भिडियो बाहिरिएपछि उनीमाथि राजीनामा गर्न दबाब परेको थियो । 

राजीनामा नगरे महाअभियोगमार्फत् हटाउने संकेत पाएपछि पाठक राजीनामा गर्ने मनस्थितिमा पुगेका हुन् ।

शुक्रवार बसेको आयोग बैठकमा राजीनामा गर्न अन्य पदाधिकारीले पाठकलाई सुझाव दिएका थिए ।

‘अख्तियार जस्तो भ्रष्टाचार नियन्त्रण गर्ने निकायको पदाधिकारी घूस काण्डमा मुछिएको भन्दै सञ्चार माध्यममा समाचार आएपछि राजीनामा गर्नु उपयुक्त हुन्छ,’ पदाधिकारीहरूले पाठकलाई भनेका थिए । 

विश्वस्त स्रोतका अनुसार बैठकमा पाठकले राजीनामा गर्ने बताएका थिए । पाठकले सम्भवतः आजै प्रमुख आयुक्त नविन घिमिरेमार्फत् राष्ट्रपतिसमक्ष राजीनामा बुझाउने सम्भावना छ । 

संविधानको धारा २३८ को उपधारा ४ मा आयुक्तको पद रिक्त हुने अवस्थाबारे उल्लेख छ । प्रमुख आयुक्त वा आयुक्तले राष्ट्रपति समक्ष राजीनामा दिएको खण्डमा पनि पदमुक्त हुने व्यवस्था संविधानमा उल्लेख छ ।

नेपाल इञ्जिनीयरिङ कलेजको विवाद मिलाउने भन्दै आयुक्त पाठकले ७८ लाख घूस लिएको समाचार सार्वजनिक भएको थियो ।