काठमाडौं – नेपाल कम्युनिस्ट पार्टी (नेकपा) का अध्यक्ष पुष्पकमल दाहाल ‘प्रचण्ड’को अमेरिका भ्रमणले जिल्ला कमिटी एकीकरण प्रक्रिया अवरुद्ध भएको छ ।
पत्नी सीता दाहालको उपचारका लागि आइतवार प्रचण्ड अमेरिका अमेरिका उडेका थिए ।

 पार्टी प्रवक्ता नारायणकाजी श्रेष्ठले प्रचण्ड अमेरिकाबाट फर्केपछि मात्र एकता प्रक्रिया टुंगो लाग्ने बताए । ‘अध्यक्षज्यू फर्केपछि मात्र जिल्ला कमिटी एकताको टुंगो लाग्छ,’ सोमवार लोकान्तरसँग कुरा गर्दै श्रेष्ठले भने, ‘जिल्ला कमिटीको बारेमा आन्तरिक छलफल भइरहेको छ । यहीबीचमा उहाँ अमेरिका जानुपर्ने भएकाले प्रक्रियामा केही ढिलाइ हुन गएको हो ।’

नेकपाभित्र लामो समयसम्म प्रदेश, जिल्ला र स्थानीय तहमा पार्टी एकताको प्रयास भइरहेको छ । तर हालसम्म टुंगो लागेको छैन ।

पार्टीभित्रको तीव्र विवादबीच मनोनयन गरिएको प्रदेश कमिटी पनि विवादित बनेको छ । पार्टी एकता प्रक्रियालाई सहज बनाउनका लागि गठन गरिएको कार्यदल पनि भंग भइसकेको छ ।

गृहमन्त्री समेत रहेका सचिवालय सदस्य रामबहादुर थापा ‘बादल’को नेतृत्वमा गठन भएको ९ सदस्यीय कार्यदल असफल भएपछि नेकपाको प्रदेश, जिल्ला र स्थानीय तहको एकताप्रक्रिया अन्योलमा परेको थियो ।
अन्योलताबीच महासचिव विष्णु पौडेलको सक्रियतामा जिल्ला कमिटीको नेतृत्व लगभग टुंगिने स्थितिमा पुगेको एक स्थायी कमिटी सदस्यले बताए ।