काठमाडौं – दक्षिण अमेरिकाको सबभन्दा ठूलो भ्रष्टाचार काण्डका आरोपित पेरुका पूर्वराष्ट्रपति अलेहान्द्रो तोलेदोलाई अमेरिकाको क्यालिफोर्नियामा सार्वजनिक ठाउँमा रक्सी पिएको आरोपमा पक्राउ गरिएको छ । अधिकारीहरूले उनलाई एक रात हिरासतमा राखेपछि सोमवार बिहान थुनामुक्त गरे । 

सान म्याट्टियो काउन्टी शेरिफ कार्यालयका प्रवक्ता रोजमेरी ब्ल्यांक्सवेडले बताएअनुसार, ७२ वर्षीय तोलेदोलाई आइतवार राति मेनलो पार्कको एक रेस्टुराँबाट पक्राउ गरिएको थियो । 

तोलेदो सन् २००१ देखि २००६ सम्म पेरुका राष्ट्रपति थिए । सान फ्रान्सिस्को क्रोनिकलका अनुसार, कार्यकाल पूरा गरेपछि उनले स्ट्यानफोर्ड विश्वविद्यालयमा अध्ययनका लागि क्यालिफोर्निया पुगेका थिए । 

तोलेदोलाई पेरुमा भ्रष्टाचार मुद्दाको आरोपित बनाइएको छ । त्यो दक्षिण अमेरिकाकै सबभन्दा ठूलो भ्रष्टाचार मुद्दा हो । पेरुका अधिकारीहरूले उनको पक्राउका लागि ३० हजार डलर पुरस्कार घोषित गरेको छ । 

राष्ट्रपति कार्यकालका बेलामा उनले ब्राजिलको निर्माण कम्पनी ओडेब्रेख्तबाट दुई करोड डलर घूस लिएका थिए । तर उनले आफूबाट कुनै भूल नभएको बताउँदै आएका छन् । 

एजेन्सी