काठमाडौं – काठमाडौंको स्वयम्भूस्थित सिद्धार्थ चोकमा मोटरसाइकल दुर्घटना हुँदा चालकको मृत्यु भएको छ ।

दुर्घटनामा घाइते भएका कीर्तिपुर नगरपालिका–६ का ३० वर्षीय सुनिल बस्नेतको उपचारका लागि अस्पताल लैजाँदै गर्दा मृत्यु भएको हो ।

सितापाइल बस्ने ३२ वर्षीया सीताकुमारी राई लगायत ३ जनालाई मोटरसाइकलले ठक्कर दिएको थियो ।

काठमाडौं उपत्यकाका काठमाडौं, भक्तपुर र ललितपुरबाट मादक पदार्थ सेवन गरेर सवारी चलाउने ८४ जनालाई प्रहरीले नियन्त्रणमा लिएको प्रहरी प्रवक्ता एसएसपी उत्तमराज सुवेदीले जानकारी दिए ।

प्रहरीले उपत्यकाका तीनै जिल्लाका मुख्य नाकामा प्रहरी चेकिङ राखेको थियो । काठमाडौं उपत्यका लगायत पहाडी जिल्लामा होली मनाइरहँदा अपराह्नसम्म अन्य अप्रिय घटना भएका छैनन् ।

काठमाडौंमा होली मनाउन नयाँ बसपार्क, भृकुटीमण्डप, लैनचौर, ठमेल लगायत १८ स्थानमा होली खेल्न अनुमति दिइएको छ । होली मनाउन वानेश्वर, भृकुटीमण्डप, वसन्तपुर लगायत काठमाडौं उपत्यकाका सबैजसो स्थानमा होली मनाउनेको भीडभाड छ । 

भीडभाड हुने क्षेत्रमा प्रहरीको सक्रियता रहेको र कुनै पनि अप्रिय घटना नभएको नेपाल प्रहरीका प्रवक्ता एसएसपी सुवेदीले बताए ।