काठमाडौं – अमेरिकालाई पौडी खेलमा पाँचपटक स्वर्ण पदक दिलाएकी खेलाडी मिस्सी फ्र्यांकलिनले हिन्दू धर्मका विभिन्न आयाम सिक्न अनि दिनदिनै रामायण र महाभारत पढ्नमा दिन बिताउने गरेकी छन् । 

सन् २०१८ को डिसेम्बर महिनामा पौडी खेलबाट संन्यास लिएपछि फ्र्यांकलिनले हिन्दू धर्ममा शान्ति भेटेकी हुन् । 

काँधमा लगातार समस्या आएपछि यी २३ वर्षीयाले छिट्टै खेलबाट संन्यास लिने बाध्यता आइपरेको थियो । तर खेल जीवनमा सक्रिय रहँदा थाहा पाउन नसकेका कुरा उनले संन्यासपछि थाहा पाइन् । 

पहिलेपहिले त उनले रमाइलोका लागि योग गर्ने गरेकी थिइन् तर हिन्दू धर्मका बारेमा अध्ययन गर्दै गएपछि उनी आध्यात्मिक गहिराइमा डुब्दै गइन् । अहिले उनी जर्जिया विश्वविद्यालयमा धर्म विषय लिएर अध्ययन गरिरहेकी छन् । 

‘म एक वर्षदेखि धर्मको अध्ययन गरिरहेकी छु र यसले मेरो आँखा खोलिदिएको छ । म विभिन्न संस्कृति, व्यक्ति र तिनीहरूको धर्मका बारेमा सिक्न मन पराउँछु,’ फ्र्यांकलिनले भारतीय समाचार संस्था पीटीआईलाई बताइन् । 

‘मेरो धर्म त क्रिश्चियन हो तर मलाई हिन्दू र इस्लाम धर्म खुबै मन परे । मलाई यी दुई धर्मका बारेमा धेरै कुरा थाहा थिएन तर उनीहरूको बारेमा अध्ययन गरेपछि ती सुन्दर धर्म हुन् भन्ने थाहा पाएँ,’ लन्डन ओलम्पिक्समा चारवटा स्वर्ण पदक जितेकी खेलाडीले भनिन् ।

अद्भुत खेलाडी हुनुका अलावा फ्र्यांकलिन प्रतिभाशाली विद्यार्थी पनि हुन् । उनलाई हिन्दू धर्मका बारेमा धेरै कुरा थाहा छ । उनलाई रामायण र महाभारत खुबै मन पर्छ र उनले यी महाकाव्यमा रहेका नाम सिक्न कडा मेहनत गरिरहेकी छन् । 

‘हिन्दू धर्मको सबभन्दा सुन्दर पक्ष भनेको कर्मको अवधारणा हो । अर्को व्यक्तिलाई भलो गरेमा, राम्रो काम गरेमा पछि गएर राम्रो परिणाम प्राप्त हुन्छ । ब्रह्माण्डको कार्य यसरी नै सञ्चालन हुन्छ ।’

‘हिन्दू धर्ममा रहेका मिथक र कथाहरू निकै सुन्दर छन् । उनीहरूका देवीदेवताका बारेमा जान्दा आनन्द लागिरहेको छ । महाभारत र रामायण पढ्नु मेरा लागि अद्भुत अनुभव हो ।’

‘महाभारतमा उल्लिखित पात्रका नाममा म झुक्किरहेको हुन्छु तर मलाई रामायणमा राम र सीताको बारेमा धेरै कुरा थाहा छ । सीताले कस्तो जीवन बिताउनुभयो अनि रामप्रति कति इमान्दार रहनुभयो भन्ने कुरा अद्भुत छ,’ उनले भनिन् । 

यसै वर्ष विवाह गर्न लागेकी फ्य्रांकलिनले भारतवर्षका तीर्थस्थलको भ्रमण गर्न चाहेकी छन् । उनलाई योगको इतिहासका बारेमा पनि निकै कुरा थाहा छ । 

‘योगको जरैसम्म पुगेर यसको प्रक्रियाका बारेमा जान्न अनि योगीहरूले कसरी वैराग्यको जीवन बाँच्थे भन्ने कुरा पढ्न आनन्द लाग्छ । म रमाइलाका लागि तीन वर्षदेखि योग गर्थें तर हिन्दू धर्मको अध्ययनमार्फत यसका बारेमा थप जानेपछि योग त मेरा लागि आध्यात्मिक अनुभव भन्दा पनि माथिको कुरा हुन पुगेको छ ।’

‘पश्चिममा योगको अध्यात्मवादलाई बेवास्ता गरियो । तर योगले आध्यात्मिक शक्तिसँगको सम्पर्क कायम गर्न अनि उक्त शक्तिसँग एकाकार हुन सिकाउँछ,’ उनले भनिन् ।

इन्डियाटुडे डट् इनबाट