काठमाडौं- नेपाल सरकार र राष्ट्रिय प्रजातन्त्र पार्टी (राप्रपा) बीच औपचारिक वार्ता सिंहदरबारस्थित कानून मन्त्रालयमा शुरू भएको छ ।

वार्तामा राप्रपाले नेपाल सरकार समक्ष पेश गरेको हिन्दु राष्ट्र, राजसंस्था लगायतका २२ बुँदे मागका सम्बन्धमा छलफल हुनेछ ।

वार्तामा सरकारको तर्फबाट कानूनमन्त्रीभानुभक्त ढकाल र राप्रपाबाट संयोजक दिपक बोहराले नेतृत्व गरेका छन् । 

राप्रपाले हिन्दूराष्ट्र घोषणा गर्नुपर्नेदेखि राजसंस्थासहित सबै राजनीतिक शक्तिहरु अटाउने नेपाली संस्करणको मौलिक प्रजातन्त्र कायम गर्न अविलम्व सर्वपक्षीय गोलमेच सम्मेलन गर्न माग गरेको छ ।

त्यस्तै राप्रपाले संघीयताबारे जनताको प्रत्यक्ष अभिमत बुझ्न राष्ट्रिय जनमत संग्रह गर्नसमेत माग गरेको छ । वर्षमा कम्तिमा पाँच लाख रोजगारी सिर्जना गर्नेगरी दीर्घकालीन आर्थिक विकास योजना सञ्चालन राप्रपाले सरकारसँग माग गरेको छ ।

पार्टीले विदेशमा लुकाएर राखिएका कालोधन देशभित्र ल्याउने, जफत गर्ने, शंकास्पद व्यक्तिहरूको बैंक खाता तत्काल रोक्का गर्ने तथा यस्ता अवैध कारोबारमा संलग्न व्यक्तिहरूलाई कानून बमोजिम कारवाही गर्न पनि सरकारसँग माग गरेको छ ।