नेयमारसँग मेरो कुनै झगडा छैन, उनी पीएसजीमै बसेको हेर्न चाहन्छु : एम्बाप्पे

साउन १९, २०७६

काठमाडौं – पेरिस सेन्ट–जर्मान क्लबका खेलाडी कीलियन एम्बाप्पेले आफू र नेयमारबीच कुनै पनि विवाद नरहेको बताएका छन् । नेयमार बार्सिलोना फर्किन खोजिरहेको हल्ला चलेको बेलामा एम्बाप्पेले नेयमारलाई टीमको फोटो खिच्ने बेलामा धक्का दिएर हटाएको एउटा भिडियो फूटेज सार्वजनिक भएपछि एम्बाप्पेको यो बयान आएको हो । 

दुई वर्षअघि कीर्तिमान रकममा बार्सिलोनाबाट पीएसजी गएका नेयमार पुनः बार्सा फर्किने हल्ला चलेको छ । यसैबीच एम्बाप्पेसँग उनको सम्बन्ध चिसिएको बताइएको छ । 


ADVERTISEMENT

जुन महिनाको शुरूतिर घुँडामा चोट लागेर आराम गरिरहेका नेयमार पूरै फिट भइसकेका छैनन् । तर शनिवार ट्रोफी देस च्याम्पियन्सको फाइनलमा पीएसजीले रेन्नेसलाई हराएर उपाधि जित्दा नेयमार पनि सेलिब्रेट गर्न गएका थिए ।

त्यसक्रममा उनलाई एम्बाप्पेले हातले समातेर पर घचेडेका थिए । मार्को भेरात्तीले नेयमारलाई फेरि तानेर ल्याएका थिए ।

एम्बाप्पेले उक्त खेलमा एक गोल गरेका थिए र उनले नेयमारलाई मन नपराएको प्रस्ट देखाउँदै घचेडेर कता पुग्यो भनी हेरेको भिडियोमा देखिन्छ । 

नेयमारले फोटोहरू खिचाइसकेपछि टीमका साथीहरूसँग हँसीमजाक गरेको देखिन्छ तर उनी र एम्बाप्पेबीच सम्बन्ध चिसिएको हल्ला चाहिँ चलिरहेको छ । 

यस सम्बन्धमा पत्रकारहरूले प्रश्न सोध्दा एम्बाप्पेले भने, ‘उनी बसून् भन्ने नै मेरो चाहना हो । मैले उनीसँग कुरा गरेको छु । उनका बारेमा मेरो के धारणा छ भन्ने उनलाई थाहा छ । हामी दुईबीच सौहार्द्रता छ । हामीहरूले इमान्दारी र सम्मानको आधारमा सम्बन्ध बनाएका छौं । म उनलाई सम्मान र प्रशंसा गर्छु भन्ने उनलाई थाहा छ ।’

नेयमारले क्लब छोड्ने हल्ला लामो समयदेखि चलिरहेको छ तर ट्रान्सफरको अवधि सकिन लागेकाले सेप्टेम्बर महिनाको शुरूआततिर नेयमारको भविष्यको टुंगो लागिसक्ने अपेक्षा छ ।

एजेन्सी
 

साउन १९, २०७६ मा प्रकाशित

प्रतिक्रिया दिनुहोस

ताजा समाचार