काठमाडौं–सत्तारुढ नेकपाभित्र यसैसाता भएका दुई बैठकका निर्णयले विवाद चुलिएको छ । वरिष्ठ नेता माधव नेपाल समूह आफूलाई ‘कर्नर’ मा पार्न अन्य सबै नेताले गठजोड गरेको निष्कर्ष निकाल्दै झनै चिढिएका छन् । 

एकताको काम सक्दा नसक्दै विशेषगरी पूर्व एमाले समूहमा विवादको खाडल गहिरिएको खबर आजको कान्तिपुर दैनिकमा छापिएको छ।  

गत शुक्रबार र आइतबार बसेका सचिवालय बैठकले नेताहरुको कार्यविभाजन गर्दै केन्द्रीय विभागको टुंगो लगायो । यद्यपि यहीबाट असन्तुष्टिको बिउ पनि रोपियो । 

शुक्रबारको बैठकले विधानमै नभएको ‘उपाध्यक्ष’ पद सिर्जना गर्दै त्यसमा वामदेव गौतमलाई लैजाने निर्णय गर्‍यो । आइतबारको बैठकले वरिष्ठ नेताहरूको वरीयता हेरफेर गर्दै नेता नेपाललाई घटुवा र झलनाथ खनाललाई बढुवा गर्‍यो ।
यी दुवै निर्णयबाट नेपाल समूह चिढिएको छ । यसलाई नेता–नेता भिडाउने र अपमान गर्ने कामका रूपमा नेपालले चित्रण गरेका छन् ।