खाडी मुलुकमा ९० प्रतिशत खाना र पेय पदार्थमा कागती र बाबरी प्रयोग गरिन्छ । किनकि, यी दुवै गर्मीका लागि अति उपयोगी फल र जडी मानिन्छ । संयुक्त अरब इमिरेट्सको दुबई, कतार र साउदी अरेबियाका स्थानीयहरूले बनाएको खानामा कागती नभै हुँदैन । चियामा पनि अरबीहरूले बाबरी हालेर नियमित खाने गरेको पाइन्छ । गर्मी मौसममा कागती र बाबरीको घनिस्ट सम्बन्ध रहन्छ । विभिन्न होटल तथा बार पनि आजल बाबरी र कागतबिना अधुरो रहन्छन् । 

बाबरी र कागती मिसाएर कम्तीमा १० थरीका पेय पदार्थहरू बनाइन्छ । विज्ञहरूका अनुसार गर्मीमा रेडीमेड कोल्ड ड्रिन्क्स् खानुभन्दा कागती–बाबरी मिसाएको पानी थेरै नै नै स्वस्थ्यकर हुन्छ । बाह्रैमहिना पाइने कागती स्वाद र स्वाथ्य दुबैका हिसाबले उत्तम मानिन्छ । भिटामिन ‘सी’ पर्याप्त पाइने कागतीलाई संसारमै प्रिय फलको रुपमा लिइन्छ । बाबरी पनि मस्तिष्कका लागि हितकारी जडी हो । गर्मी मौसममा स्किन ड्राइ हुने गर्छ । यस्तोमा नियमित रुपमा कागती खाएका स्किन मुलायम हुन जान्छ । 

बल्र्ड सुगर म्यानेजमेन्ट गर्न र शरीरको वजन घटाउन पनि कागती लाभदायी मानिन्छ । अल्सर र क्यान्सरजस्ता रोगका लागि पनि कागती फलदायी हुन्छ । आँखाको सुरक्षा, अल्सर र पाइल्स हुनेहरूका लागि पनि कागती नियमित प्रयोग गर्नु राम्रो मानिन्छ । कागतीजस्तै पुदिना पनि छालाको सुरक्षा र वजन घटाउन अतिउपयोगी जडी मानिएको छ । 

दाँतको समस्या हुनेलाई पनि नियमित बाबरी खानाले लाभदायी हुन्छ । स्मरण शक्ति कम हुनेले पनि नियमित बाबरी प्रयोग गर्दा फाइदा पुग्छ । यसमा कार्बोहाइड्रेड, प्रोटिन, जिन्कलगायत २१ तत्व पाइन्छ । १०० ग्राम बाबरीबाट लगभग ७० किलो क्यालोरी प्राप्त हुन्छ । ब्लड सर्कुलेसन राम्रो गर्न र सुत्केरी महिलाको ब्रेस्टको निप्पलको दुखाइ कम गर्न पनि पुदिनाको प्रयोग उत्तम मानिएको छ ।

कागती पुदिना मिसाएर के–के बन्छ परिकार ?         
नेपालमा कागती र बाबरी अन्य देशको तुलनामा धेरै सस्तो पाइन्छ । यसको उपयोगिता नबुझेर प्रयोग कर्ता कम छन् । यसैकारणले होला सस्तोमा मिल्ने गरेको । तर संसारभरका प्रायः सबै देशमा यी दुबै महंगो गरी किन्नुपर्ने हुन्छ । कागती र बाबरीको पेय युवाहरूको लोकप्रिय ड्रिन्कमा पर्छ । ब्युटी सलोनहरूमा पनि कागती र बाबरी पर्याप्त प्रयोग गरेको पाइन्छ ।

भुइँकटरको जुस, कागती, बाबरी र बरफ मिसाएर गर्मीका लागि उत्तम ड्रिन्क्स तयार गरिन्छ र यो लोकप्रिय पनि छ । कागती र बाबरीको पेयले ठण्डामात्र गर्ने होइन, कयौँ औषधीय फाइदा पनि पुर्याएको हुन्छ । गर्मीमा मजिटो ड्रिन्क्स पनि सबैको प्रिय ड्रिन्क्स हो । जुन कागती, बाबरी सुगर सिरप, बरफ र वाइन हालेर तयार गरिन्छ । साउथ साइड ड्रिन्क्स पनि कागती, बाबरी, हनी, बरफ र चिया हालेर तयार गरिन्छ ।

त्यस्तै कुकम्बर कुलर, लेमोनेड, फ्रेस मिन्ट टी, डेजर्ट कुलर, मिन्ट लेमोन स्मुथी, रिप्फेसिङ लेमोन मिन्ट, सोडा, गिन्जर मिन्ट, लेमोनेट, चक्लेट लाइम, मिन्ट मजिटो, मिन्ट सिट्रस, वाटर मिलन र  कुलरलगायतका लोकप्रिय पेय पनि कागती र बाबरीबिना बनाउन सकिन्न ।

कागती र पुदिनाको संयोजनबिना धेरै पदार्थ अधुरा
कागतीे जेसङ्ग पनि मिल्छ । बिहानदेखि बेलुकासम्मको भोजनमा कागतीको प्रयोग हुन्छ । खानाको परिकारमा कागती जति प्रयोग हुन्छ, त्यसको कयौँ गुणा पेय पदार्थमा प्रयोग हुन्छ । पेय पदार्थमा कागतीको साथी पुदिना हो । चाहे अल्कोहल होस् या ननअल्कोहल अधिकांश पेय पदार्थमा कागती र पुदिनाको संयोजन हुन्छ ।

कागती र पुदिनाको एक स्फुर्तिदायी र स्वादिष्ट संयोजन हुन्छ । कागतीको अम्लियपन र पुदिनाको चिसोले स्फुर्तिदायी स्वादसँग राम्रोसँग जोड्न मद्दत गर्छ । कागती र पुदिनाको चियाले तपाईंको शरीरलाई केही मिनेटमै रि–हाइड्रेट गर्न सक्छ । किनकि यसले थकान, तनाब आदिका कारण हाम्रो शरीरले निरन्तर हराउने तरल पदार्थलाई प्रतिस्थापन गर्न मद्दत गर्दछ ।

कागती र पुदिनाको मिश्रणले हाम्रो शरीरमा एक किसिमको ताजगीपन पैदा गर्छ र थकान मेटाउन मद्दत पुर्याउछ । हरेक घरको भान्सा होस् या रेस्टुरेन्टको भन्सा र बारमा पुदिना र कागतीबिना अधुरो रहन्छ । नेपालमा रेस्टुरेन्टहरूको ब्यापक आगमनसँगै पुदिना र कागतीको निकै खपत हुन थालेको हो । कुनै जमानामा गाई–भैँसीले नखाने पुदिनाको अहिले चर्को भाउ छ । 

पुदिनाबिना धेरै परिकार र पेय पदार्थ अधुरा रहन्छन् । कागती त झन् एक अभिन्न अङ्गजस्तै भइसकेको छ । गर्मी महिनामा त झन् यी दुबैको दोब्बर माग हुन्छ । कागती र पुदिनाको गाउँ–घरभन्दा पनि शहर बजारमा ठूलो माग छ र खपत पनि कयौँ गुणा बढी हुन्छ ।  

भारतीयहरू पनि कागती र पुदिनाका पारखी हुन्छन् । उनीहरू सदियौँदेखि चटपटे खाना रुचाउने हुनाले अधिकांश परिकारमा पुदिना र कागतीको प्रयोग गर्छन् । बिर्यानीमा होस् या काबाब टिक्का सबैमा उनीहरूलाई कागती र पुदिनाको मिश्रण मन पर्छ । 

पेय पदार्थमा होस् या चटपटे बनाउँदा होस् पानीपुरी बनाउदा होस् या समोसाचाट सबैमा उनीहरूलाई कागती र पुदिना एक अभिन्न अङ्गको रुपमा चाहिन्छ–चाहिन्छ ।  भारतीहरूको रास्ट्रिय अचार नै पुदिनाको हो । जुन दही, कागती, पुदिना, हरियो खुर्सानी, धनिया, कालो नुन आदि हालेर तयार गरिन्छ ।