केही वर्षअघि ‘अनुराग’बाट फिल्म क्षेत्रमा डेब्यु गरेकी अभिनेत्री एलिजा गौतम नयाँ फिल्ममा अनुबन्धित भएकी छन् । पहिलो फिल्म असफल भएयता उनी अन्य फिल्ममा देखिएकी थिइनन् । म्युजिक भिडियोमा भने लगातार काम गरिरहेकी उनले निर्देशक समुद्र भट्टको फिल्ममा काम गर्न लागेकी हुन् । 

अभिनेत्री एलिजा गौतम र अभिनेता निश्चल खड्कालाई लिएर भट्टले फिल्म बनाउन लागेकी हुन् । 

द स्काई ओसन इन्टरटेनमेन्टको ब्यानरमा निर्माण गर्न लागिएको अनटाइटल प्रोजेक्टमा उनले एलिजा र निश्चललाई मुख्य भूमिकामा शनिबार अनुबन्धित गराएकी छन् ।

आगामी वैशाखभित्र छायांकन सुरु गर्ने गरि तयारी गरिएको फिल्मका बारेमा केही दिनमै सम्पूर्ण जानकारी दिने निर्माण पक्षले जनाएको छ । ‘लभ स्टोरी–क्राइम थ्रिलर’ रहने फिल्ममा  समुद्रकै कथा रहने छ । एलिजाको यो दोस्रो फिल्म हुनेछ । 

निश्चलले ‘लण्डन टु पेरिस’बाट रजतपटमा डेब्यु गरेका हुन् । यो फिल्म प्रदर्शनको तयारीमा छ । समुद्रले निर्देशन गरेको ‘गुन्यो चोलो’ प्रदर्शनको पर्खाइमा रहेको छ ।