अख्तियार दुरुपयोग अनुसन्धान आयोगले नापी र मालपोत कार्यालय प्रमुखसहित २८ जना कर्मचारीविरुद्ध भ्रष्टाचार मुद्दा दायर गरेको छ ।

सरकारी जग्गा व्यक्तिको नाममा कायम गरेको आरोपमा आयोगले मुद्दा दायर गरेका कुल १७२ जना प्रतिवादीमध्ये २८ जना सरकारी कर्मचारीहरू छन् ।

अख्तियारले झापाको चन्द्रगढीस्थित नापी कार्यालयका प्रमुख विष्णुकुमार न्यौपानेसहित १७२ जनाविरुद्ध आइतवार विशेष अदालत काठमाडौंमा मुद्दा दायर गरेको हो ।

हालसाबिक जग्गा दर्ता प्रक्रियाबाट सरकारी सार्वजनिक जग्गा व्यक्ति विशेषको नाममा दर्ता गरी गैरकानूनी लाभ तथा हानी पुर्‍याई भ्रष्टाचार गरेको भन्दै आयोगले मुद्दा दायर भएको हो ।

आयोगका प्रवक्ता नरहरि घिमिरेका अनुसार झापाको साबिक दमक ६ ग को सर्पट नापीको समयमा दमक नगरपालिका वडा नम्बर  १३ र १४ कायम भएको बालुवाटारको (रतुवा र दिपिनी खोलाको दोभानबाट उत्तर तर्फ) विभिन्न कित्ताका २९ विगाहा १७ कट्ठा ४ धुर (३९७ रोपनी ८ आना १ पैसा ३ दाम) जग्गा गैरकानूनीरुपमा व्यक्ति विशेषको नाममा घुसाई हालसाबिक जग्गा दर्ता कायम गरिएको छ ।

उक्त जग्गाको मूल्यांकन ३४ करोड ६६ लाख ५४ हजार ८४९ रुपैयाँ कायम गरिएको छ ।

उक्त मुद्दामा सरकारी सार्वजनिक पदधारण गरेको नापी कार्यालय, चन्द्रगढी, झापाका कर्मचारीहरू १० जना, मालपोत कार्यालय, दमक, झापाका कर्मचारीहरू ११ जना, नापी कार्यालय, दमक, झापाका कर्मचारीहरू ७ जना गरी २८ जना कर्मचारीविरुद्ध मुद्दा दायर गरिएको हो ।

त्यसै गरी सरकारी सार्वजनिक जग्गा गैरकानूनी तरिकाले हालसाबिक जग्गा दर्ता प्रकृयाबाट आफ्नो जग्गामा घुसाई दर्ता कायम गरेका शुरु जग्गा दर्तावाला ३६ जना र बिगो असुल उपर तथा जग्गा जफत प्रयोजनका लागि मात्र प्रतिवादी बनाईएका प्रतिवादीहरु १०८ (एक सय आठ) जना गरी जम्मा प्रतिवादीको संख्या १७२ जना रहेको अख्तियारले जनाएको छ ।