विराटनगर नर्सिङ क्याम्पसमा बीएनएस र बीएस्सी नर्सिङमा अध्ययनरत तीनजना छात्रामाथि कुटपिट गरेको आरोपमा होस्टेलकी सञ्चालिका पक्राउ परेकी छिन् । 

विराटनगर महानगरपालिका-८ मधुमारास्थित मुनलाइट गल्र्स होस्टेलकी सञ्चालिका मधु रेग्मी पक्राउ परेकी हुन् ।  मंगलवार साँझ होस्टेलको कोठाभित्रै छात्राहरूलाई हातपात गरेकी उनलाई बुधवार दिउँसो पक्राउ गरिएको मोरङ प्रहरीले जनाएको छ । 

रेग्मीले छात्रामाथि गरेको दुव्र्यवहारका भिडियो सामाजिक सञ्जालमा भाइरल भएको छ । पीडित छात्राले उजुरी दिएपछि पक्राउ गरिएको जिल्ला प्रहरी कार्यालय, मोरङका प्रमुख एसपी नवराज कार्कीले जानकारी दिए । पक्राउ परेकी रेग्मीलाई अभद्र व्यवहारको मुद्दामा म्याद थप गर्ने तयारी पनि प्रहरीले गरेको छ । 

होस्टेलमा बसिरहेका विद्यार्थीले अग्रिम रकम दिन नमानेपछि रेग्मीले उनीहरूका सामान कोठाबाट बाहिर फ्याँक्दै हातपात गरेको भिडियोमा देखिएको छ । दुव्र्यवहारमा परेका विराटनगर नर्सिङ क्याम्पस पहिलो वर्षमा भर्ना भएका जुम्ला, पाल्पा र कञ्चनपुरका छात्रा रहेको क्याम्पस प्रशासनले जनाएको छ । 

उनीहरू उक्त होस्टेलमा फागुन ३ गतेदेखि बसिरहेका थिए । उनीहरू एक महिनाको अग्रिम भुक्तानी आठ हजार रुपैयाँ बुझाएर होस्टेलमा बसेको क्याम्पस प्रशासनले जनाएको छ  

‘बुधवारदेखि कलेजकै होस्टेलमा बस्ने तयारी गरेका थिए । होस्टेल छोड्ने भएपछि सञ्चालिकाले तीन हजार माग्नु भएको रहेछ,’ विराटनगर नर्सिङ कलेजकी प्रमुख मेनुका भण्डारीले भनिन्, ‘हामी अनावश्यक पैसा तिर्दैनौं भनेपछि हाम्रा विद्यार्थीमाथि हातपात भएको हो ।’ पैसा तिरिसकेको अवस्थामा पनि कलेजको होस्टेलमा जाने भनेपछि सञ्चालिका रेग्मीले थप पैसा मागेको भण्डारीले बताइन् । 

रेग्मीले हातपात गरेपछि आत्तिएका विद्यार्थीलाई मंगलवार राति नै कलेज प्रशासनले आफ्नै होस्टेलमा सारेको छ  । नर्सिङ क्याम्पसकी प्रमुख भण्डारीले छात्राहरूमाथि अमानवीय व्यवहार भएकाले सञ्चालिका रेग्मीविरुद्ध कानूनी उपचारमा गइएको स्पष्ट पारिन् ।