पोखरास्थित सूर्यदर्शन बचत तथा ऋण सहकारी संस्थाका पीडितहरूले संसद्को राज्य व्यवस्था तथा सुशासन समितिमा उजुरी दिएका छन् ।

पीडितहरूले बिहीवार समितिका सभापति रामहरि खतिवडासमक्ष उपप्रधान तथा गृहमन्त्री रवि लामिछानेलगायत अन्यविरुद्ध उजुरी दिएका हुन् ।

उक्त उजुरीमा १८ हजार ७०० वचतकर्ताको लगभग १ अर्ब ४० करोड रुपैयाँ हिनामिना भएको र विगत २ वर्षदेखि कुनै पनि निक्षेपकर्ताले १ रुपैयाँ पनि फिर्ता पाउन नसकेको उल्लेख छ । 

’विगत लामो समय लगाएर, आफ्नो अमूल्य समय खर्चेर, आफ्ना परिवारका इच्छा–आकांक्षालाई निमोठेर छोराछोरीको उज्वल भविष्य र बिरामीको औषधि उपचार र बूढाबूढी भएका बा–आमाको खानपिन, औषधिमुलोका साथै मृत्युपश्चात् काजकिरियाका लागि यस सहकारीमा बचत जम्मा गरिएको थियो,’ उजुरीमा भनिएको छ । 

उजुरीमा लाखौँ जनताको घरमा चुल्हो नबालेको, छोराछोरीको शुल्क तिर्ने नसक्दा विद्यालय जान र परीक्षाबाट बन्चित हुन परेको लगायतका विषय पनि उल्लेख छन् । 

उजुरीसँगै गत माघ २२ गते कास्की जिल्ला प्रहरी कार्यालयमा हालिएको पूरक जाहेरी पनि समावेश गरिएको छ । उक्त जाहेरीमा पनि पहिलो नाम गृहमन्त्री लामिछानेकै छ । 

’काठमाडौं जिल्ला वडा नम्बर ६ बस्ने लालचन्द्र लामिछानेको छोरा वर्ष ४८ को रवि लामिछाने, गोर्खा मिडिया नेटवर्क प्राइभेट लिमिटेडका प्रबन्ध निर्देशक’ पूरक जाहेरीको १ नम्बरमै लामिछानेको नाम यसरी उल्लेख गरिएको छ । 

त्यसपछि उक्त पूरक जाहेरीमा पूर्वसञ्चालक समितिका अध्यक्ष ज्ञानबहादुर बम्जन, नेत्रपाणि बाँस्तोला, पूर्वउपराष्ट्रपति नन्दकिशोर पुनका छोरा दीपेश पुनलगायतको नाम उल्लेख छ । 

समितिका सभापति खतिवडाले समितिमा उजुरी परेको र पहिलो नम्बरमै गृहमन्त्री रहेका लामिछानेको नाम रहेको लोकान्तरलाई बताए । 

’सूर्यदर्शन बचत तथा ऋण सहकारी संस्थाका पीडितहरूले बिहीवार समितिमा उजुरी हाल्नुभएको छ,’ खतिवडाले भने, ’गृहमन्त्रीको नाम पहिलो नम्बरमै छ । समितिमा उजुरी आइसकेपछि यो छलफल र अन्य प्रक्रियामा जान्छ ।’

गृहमन्त्री लामिछानेविरुद्ध उजुरी दिन सहकारी पीडितहरू पोखराबाट बस चढेर काठमाडौं आएका हुन् । यसअघि लामिछाने राज्य व्यवस्था समितिको सदस्य थिए । 

राज्य व्यवस्था समितिको क्षेत्राधिकारमा गृह मन्त्रालय पर्ने भएपनि सहकारी पीडितको उजुरी हेर्ने विषयमा संसद्को नियमावलीले समितिलाई अधिकार दिएको छैन ।

यस्तो छ उजुरी र जोहेरीः