नेपाली कांग्रेसका नेता डा. शेखर कोइरालाले सरकार गठन र विघटनको जड निर्वाचन प्रणालीमा रहेको बताएका छन् । 

संविधान संशोधन नहुँदासम्म देशमा राजनीतिक अस्थिरता कायम रहने उनको दाबी छ ।

लुम्बिनीमा आयोजित नेपाल शिक्षक संघको २३औं संघीय प्रतिनिधि सभालाई बुधवार सम्बोधन गर्दै कोइरालाले अहिलेको राजनीतिक समस्याको जड निर्वाचन प्रणालीले निम्त्याएको बताए ।

'सरकार गठन र विघटन हुने अहिलेको समस्याको जड निर्वाचन प्रणालीले निम्त्याएको हो, संविधान संशोधन नगरेसम्म देशमा राजनीतिक स्थिरता कायम हुँदैन', उनले भने ।

संविधान संशोधनमार्फत सुशासन, विकास र समृद्धिको बाटोमा हिँडाउन कांग्रेस र एमाले मिलेर अगाडि बढ्नुपर्ने आवश्यकता रहेको उनको भनाइ छ ।

'संविधान सभाको पहिलो निर्वाचनबाट कम्युनिस्टहरू पटक-पटक सत्तामा पुगे पनि संविधान बनाउन सकेनन्, जब दोस्रो संविधान सभाबाट कांग्रेसको नेतृत्वमा सरकार बन्यो, अनि मात्रै संविधान जारी भयो । परिवर्तन कांग्रेसबाट मात्रै सम्भव छ भन्ने कुरा बुझ्न पर्‍यो', कोइरालाले भने 'त्यसैले अब कांग्रेस र एमाले मिलेर संविधान संशोधन गर्नुपर्ने आवश्यकता छ ।'

नेता कोइरालाले राजनीतिक स्थिरता, सुशासन र विकास आफ्नो मूल एजेन्डा भएको बताए । 

कोइरालाले पार्टीभित्रको तिक्तता र मनमुटाव बिर्सेर संगठनमा लाग्न र एक्लै निर्वाचन लड्ने तयारीमा जुट्न कार्यकर्तालाई निर्देशनसमेत दिए ।