गण्डकी प्रदेशका कामचलाउ मुख्यमन्त्री खगराज अधिकारी नेतृत्वले मन्त्रालय फुटाउने निर्णय गरेको छ । 

मंगलवारको मन्त्रिपरिषद्ले मन्त्रालय फुटाएर ९ वटा बनाइने निर्णय गरेको बिहीवार सार्वजनिक भएको छ । 

अहिले गण्डकीमा मुख्यमन्त्रीसहित ७ सदस्यीय मन्त्रिपरिषद् छ । मंगलवार बसेको मन्त्रिपरिषद् बैठकले स्वास्थ्य र कानून मन्त्रालय थप्न सिफारिस गरेको हो ।

यता मन्त्रिपरिषद्को निर्णय सार्वजनिक हुनुअघि नै बुधवार सर्वोच्च अदालतले गण्डकीमा मुख्यमन्त्री अधिकारीलाई कामचलाउ सरकारको रुपमा रहँदै दीर्घकालीन असर पर्ने कुनै पनि निर्णय नलिन आदेश दिएको छ । तर मुख्यमन्त्री अधिकारीले यसअघि नै मन्त्रालय फुटाउने निर्णय लिएका छन् ।

यस्तोमा उनको निर्णय अब के हुन्छ भन्ने अन्योलता छाएको छ । 

यसअघि तत्कालीन नेपाली कांग्रेसबाट मुख्यमन्त्री बनेका कृष्णचन्द्र नेपाली नेतृत्वको सरकारले गण्डकीमा मन्त्रालय थपेर १२ पुर्याएको थियो । मन्त्रालयको संख्या बढी भएपछि आलोचनासमेत भएको थियो । त्यसपछि नेकपा (एमाले) संसदीय दलका नेता खगराज अधिकारी मुख्यमन्त्रीमा निर्वाचित भएर आएपछि आफ्नो नेतृत्वमा मन्त्रालय संख्या घटाउने बताएका थिए । सोहीअनुरुप उनले गण्डकीको मुख्यमन्त्री भइसकेपछि १२ मन्त्रालय घटाएर ७ बनाएका थिए । 

गण्डकीको मुख्यमन्त्रीमा दोस्रो इनिङ्स सम्हालिरहेका अधिकारीले मन्त्रालयको संख्या थप्ने निर्णय गरेका छन् । 

मंगलवार बसेको मन्त्रिपरिषद् बैठकले गण्डकीको सामाजिक विकास तथा स्वास्थ्य मन्त्रालय फुटाएर स्वास्थ्य बेग्लै मन्त्रालय बनाउने निर्णय गरेको हो । यस्तै, आन्तरिक मामिला मन्त्रालय फुटाएर कानुन मन्त्रालय थप्ने निर्णय भएको छ । 

बुधवार मात्र सर्वोच्च अदालतले गण्डकीमा मुख्यमन्त्री अधिकारीलाई कामचलाउ सरकारको रुपमा रहँदै दीर्घकालीन असर पर्ने कुनै पनि निर्णय नलिन आदेश दिएको छ ।