नेपाली कांग्रेसका महामन्त्री गगन थापाले चिकित्सा शिक्षासम्बन्धी जाँचबुझ आयोगको प्रतिवेदन सार्वजनिक गरेको भन्दै शिक्षामन्त्री सुमना श्रेष्ठलाई धन्यवाद दिएका छन् । बिहीवार सामाजिक सञ्जालमा लेख्दै थापाले प्रतिवेदनले उजागर गरेका सम्बन्धन, भर्ना, सिट, शुल्कसहितका विषयलाई व्यवस्थित बनाउन पनि माग गरेका छन् । 

‘चिकित्सा शिक्षासम्बन्धी जाँचबुझ आयोगको प्रतिवेदन सार्वजनिक गर्ने कार्यका लागि शिक्षा मन्त्रीज्यूलाई धन्यवाद ! आयोग बन्ने तर प्रतिवेदन सार्वजनिक नहुने अनि कार्यान्वयन त हुँदै नहुने प्रवृत्तिमा बीचमा प्रतिवेदन सार्वजनिक गर्नु नै आफैँमा सकारात्मक छ । प्रतिवेदनले उजागर गरेका सम्बन्धन, भर्ना, सिट, शुल्क लगायतका कतिपय विषयमा चिकित्सा शिक्षा ऐन नै बनेर आयोगमार्फत कार्यान्वयनको चरणमा छन्,’ थापाले फेसबूकमा लेखेका छन्, ‘त्यसलाई थप प्रभावकारी बनाउनु पर्नेछ । यससँगै प्रतिवेदनले आधार र कारण खुलाएरै जस–जसलाई कारवाहीको सिफारिस गरेको छ त्यो सिफारिस कार्यान्वयनको दिशामा अगाडि बढ्छ भन्ने विश्वास छ  र यो सत् प्रयासमा हाम्रो साथ रहने प्रतिबद्धता पनि !’

महामन्त्री थापा यतिबेला इलाम– २ को चुनावी अभियानमा पुगेका छन् । त्यहीँबाट उनले शिक्षामन्त्री श्रेष्ठलाई सामाजिक सञ्जाल​मार्फत धन्यवाद दिएका हुन् ।

इलाम पुगेर महामन्त्री गगन थापाले देशलाई सम्हाल्ने पार्टीको नेतृत्व चाहिएको बताएका थिए ।

बिहीवार फाकफोकथुम गाउँपालिका–३ आमचोकमा आयोजित घरदैलो कार्यक्रमलाई सम्बोधन गर्दै उनले देशलाई सम्हाल्ने नेतृत्व कांग्रेसले मात्र गर्न सक्ने दाबी गरे ।

महामन्त्री थापाले विभिन्न जातिले उठाएको पहिचानको मुद्दालाई सम्हालेर लैजाने दल कांग्रेस नै भएको जिकिर गरे ।

इलाम–२ को चुनावी अभियानमा पुगेर गगनले भने: देशलाई सम्हाल्ने पार्टीको नेतृत्व चाहिएको छ