नेपाली कांग्रेसको संस्थापनइतर पक्षका नेता डा शेखर कोइरालाले देश दुर्घटनाको संघारमा पुगेकाले पार्टीभन्दा माथि उठेर आफूले राष्ट्र बचाउने अभियान शुरू गरेको बताएका छन् ।

घोराहीमा बिहीवार आयोजित कांग्रेस दाङको दोस्रो जिल्ला सम्मेलनलाई सम्बोधन गर्दै देश दुर्घटनातर्फ गएकाले दुई ठूला दल छिटोभन्दा छिटो एक ठाउँमा उभिएर देशलाई निकास दिनुपर्ने धारणा राखे । 

आफ्नो दल कांग्रेस र नेकपा (एमाले) मिलेर देशलाई निकास दिनुपर्ने नेता कोइरालाले प्रस्ताव राखेका हुन् ।

‘देश बचाउनकै लागि संसद्मा रहेका पहिलो र दोस्रो दल मिल्नुपर्छ भनेर मैले भन्दै आएको हुँ,’ उनले भने, ‘राजनीतिक दलहरुले देश पहिले भन्ने कुरालाई प्राथमिकतामा नराखेसम्म राष्ट्र बन्दैन, छिटोभन्दा छिटो दुई ठूला दल एक ठाउँमा उभिएर देशलाई निकास दिऊँ ।’

राजनीतिक दलहरूले राष्ट्रलाई प्राथमिकता नराखेकै कारण जनतामा निराशा छाएको कोइरालाले बताए ।

नेताहरूले पहिले आफू, त्यसपछि पार्टी अनि मात्रै देशलाई राख्ने गरेकाले राष्ट्र संकटमा परेको दु:खेसो उनले पोखे ।

नेता कोइरालाले कांग्रेसलाई एक्लै चुनाव लडेर बहुमत ल्याउन सक्ने अवस्थामा नपुर्याएसम्म आफ्नो यात्रा नरोकिनेसमेत बताए ।