नेकपा एमालेका अध्यक्ष केपी शर्मा ओलीले माधव नेपाल नेतृत्वको नेकपा एकीकृत समाजवादीले अराजनीतिक र दक्षिणपन्थी चरित्र देखाएको आरोप लगाएका छन् । सुदूरपश्चिम सरकारमा वामपन्थी सत्ता समीकरणलाई समर्थन नगरेर कांग्रेसलाई समर्थन गर्नु अराजनीतिक चरित्र भएको ओलीको टिप्पणी छ । 

सोमवार बसेको पार्टी संसदीय दलको बैठकलाई सम्बोधन गर्दै ओलीले सुदूरपश्चिममा नेकपा एसको निर्णयले सही दिशामा उन्मुख राजनीतिलाई बिथोल्ने काम भएको बताए । ‘हिजो मात्र एस भन्ने पार्टी छ, त्यसले हामीसँग हुँदा पहिलो कार्यकाल नागरिक उन्मुक्तिलाई दिन नसक्ने भन्यो । हामीभन्दा पृथक हुने हो भने कांग्रेसलाई जिताउने हो भने, यो समीकरणलाई कमजोर बनाउन नि:शुल्क सेवा गर्न सक्ने कुरा गर्‍यो । एकीकृत समाजवादी नामको पार्टीले अराजनीतिक निर्णय लियो, जुन सही दिशामा राजनीति फर्किंदै थियो’ ओलीले भने । 

नेकपा एसको निर्णयले जनतामा आशंका पैदा गरेको ओलीले बताए । ‘विपक्षीको आशा पलाउने र जनतामा आशंका पैदा हुनेगरी कदम चाल्यो । बोली व्यवहार त्यस्तै थिए, हिजो व्यवहारमा प्रकट भयो । यस समीकरणबाट नगर्ने, कांग्रेस केन्द्रित समर्थन गर्ने । एस पार्टीको दक्षिणपन्थी अवसरवादी चरित्र धेरै नांगो ढंगले प्रकट भयो’ ओलीले भने । 

यसअघि नेकपा एसले कांग्रेसले समर्थन गरेको नागरिक उन्मुक्ति पार्टीको रेशम चौधरी पक्षको उम्मेदवार लक्ष्मणकिशोर चौधरीलाई मुख्यमन्त्री बनाउन समर्थन गर्ने निर्णय गरेको थियो ।