भारतमा आम निर्वाचन नजिकिएको समयमा नेपाल–भारत सीमावर्ती क्षेत्रमा हुनसक्ने सम्भावित अवाञ्छित गतिविधि रोक्न नेपालले सतर्कता अपनाउनु पर्ने सुरक्षा स्रोतहरूले बताएका छन् ।

सुरक्षा चुनौती सृजना गर्ने गरी सीमावर्ती क्षेत्रमा तेस्रो मुलुकका मान्छेको अवाञ्छित गतिविधि बढ्न थालेको स्रोतहरूले बताएका छन् । 

भारतमा अप्रिल देखि जुन १ सम्म आम निर्वाचन हुँदैछ । निर्वाचनको समयमा सीमावर्ती क्षेत्रमा सुरक्षा चुनौती खडा गर्न केही अवाञ्छित तत्व लागि परेको स्रोतहरू बताउँछन् । चुनावको समयमा सीमावर्ती क्षेत्रमा सुरक्षा चुनौती सृजना गर्ने खालका गतिविधि रोक्न भारतले नेपालसँग आग्रह गरिसकेको छ । 

गृहमन्त्री रवि लामिछानेसँग चैत्र १३ गते भएको भेटमा नेपालका लागि भारतीय राजदूत नवीन श्रीवास्तवले सीमा क्षेत्रमा हुने आपराधिक घटना रोक्न सरकारको ध्यानाकर्षण गराएका थिए ।

भेटमा राजदूत श्रीवास्तवले सीमावर्ती क्षेत्रमा हुने साना अपराध नियन्त्रण र मानव ओसार–पसार समन्वयका लागि थप नीतिगत प्रबन्ध गर्नुपर्नेमा जोड दिएका थिए ।

राजदूत श्रीवास्तवले नेपालको सुरक्षा सुदृढीकरण तथा आतंक वाद नियन्त्रणका लागि आवश्यक पर्ने स्रोत–साधन उपलब्ध गराउन भारत इच्छुक रहेको बताएका थिए । 

चैत्र २८ गते मधेश प्रदेशमा भएको प्रदेश स्तरीय सुरक्षा गोष्ठीमा सीमा क्षेत्रमा हुनसक्ने अवाञ्छित गतिविधि रोक्ने बारे समेत छलफल भएको थियो ।

गृहमन्त्री लामिछाने मधेश प्रदेशका आन्तरिक मामिला मन्त्री राजकुमार लेखी सहित नेपाल प्रहरी र सशस्त्र प्रहरीका प्रमुखहरू सहभागी गोष्ठीमा भारतको चुनावको बेला सीमा क्षेत्रमा अवाञ्छित गतिविधि हुन नदिने बारे छलफल भएको थियो । 

भारतको चुनावको पूर्वसन्ध्यामा नेपालको सीमावर्ती क्षेत्रमा तेस्रो मुलुकका नागरिकको गतिविधि बढेको सुरक्षा स्रोतहरूले बताएका छन् । सीमा क्षेत्रमा कट्टरपन्थी पाकिस्तानी मुस्लिम नेपालका मदरसा र स्थानीयको घरमा बसेको सुरक्षा स्रोतको दावी छ । उनीहरूमाथि निगरानी समेत भइरहेको छ । 

तराईका सीमावर्ती क्षेत्रमा पुगेका तेस्रो मुलुकका ती व्यक्तिहरू पर्यटक भिसामा आएर नेपालमा बसाइ लम्बाइ रहेका सुरक्षा स्रोतको दावी छ । ‘त्यसरी तराईका सीमा क्षेत्रमा सक्रिय व्यक्तिहरू पाकिस्तान टर्की लगायत मुलुकबाट मस्जिदमा सहयोग जुटाउने र मुस्लिम बस्तीमा विकासको कुरा गरिरहेका छन’ स्रोतले भन्यो । 

उनीहरूले सुनसरीमा इस्लाम धर्मावलम्बीको मेला इज्त्तेमा (इस्लामी मण्डली)को लागि नेपालका स्थानीय मुस्लिम समुदायसँग लबिङ गरिरहेको स्रोतको दावी छ । यस्तो भेला सन् २०२१ मा सप्तरी जिल्लामा गरिएको थियो । त्यो बेला भारत, पाकिस्तान, बंगलादेश र गल्फ मुलुकका समेत कट्टरपन्थीहरू भेला भएका थिए ।