नेपाली राष्ट्रिय क्रिकेट टोलीका सदस्य दीपेन्द्रसिंह ऐरीलाई नेपाल प्रहरीका प्रहरी महानिरीक्षक (आईजीपी) वसन्तबहादुर कुँवरले बधाई दिएका छन् । 

आईजीपी कुवँरले दीपेन्द्रलाई आईसीसी टी–२० वरीयताको अलराउन्डरतर्फ ११औं स्थानमा उक्लिएकोमा बुधवार दिएका हुन् ।

दीपेन्द्र नेपाल प्रहरीको क्रिकेट टोेलीका खेलाडी पनि हुन् । यसैकारण उनलाई आईजीपी कुवँरले बधाई दिएका हुन् ।

‘मेन्स आईसीसी टी–२० को अलराउन्डर वरीयतामा विश्वको ११ औँ र एसोसिएट राष्ट्रका नम्बर एक अलराउन्डर बन्न सफल नेपाल प्रहरीका क्रिकेट खेलाडी दीपेन्द्रलाई हार्दिक बधाई,’ उनले सामाजिक सञ्जालमार्फत् दिइएको बधाई पुस्तिकामा भनिएको छ ।

दीपेन्द्र बुधवार मात्रै आईसीसी टी–२० वरीयताको अलराउन्डरतर्फ ११औं स्थानमा उक्लिएका छन् ।

अन्तर्राष्ट्रिय क्रिकेट काउन्सिल (आईसीसी)ले जारी गरेको नयाँ वरीयतामा दीपेन्द्र १४औं स्थान सुधार गर्दै ११औं स्थानमा पुग्न सफल भएका हुन् ।

त्यसैगरी ब्याटिङतर्फको विश्व वरीयतामा १६ स्थान सुधार गर्दै दीपेन्द्र ६२ औं स्थानमा उक्लिएका छन् । 

उनी हाल ओमानमा जारी एसीसी प्रिमियर कप क्रिकेट प्रतियोगितामा उत्कृष्ट प्रदर्शन गरिरहेका छन् ।

उनले उक्त प्रतियोगताअन्तर्गत कतारविरुद्धको खेलमा एकै ओभरमा ६ छक्का प्रहार गरेका थिए । यो पनि एउटा कीर्तिमान बराबरी हो ।

ब्याट्सम्यानको नयाँ वरीयतामा नेपाली टोलीका कप्तान रोहितकुमार पौडेल ५३ औं स्थानमा रहँदा आसिफ शेखले ३६ स्थान सुधार गर्दै ७५ औं स्थानमा उक्लेका छन् ।

त्यस्तै कुशल मल्ल नौ स्थान सुधार गर्दै १०० औं स्थानमा पुगेका छन् ।