सुदूरपश्चिम प्रदेशको मुख्यमन्त्रीमा नेकपा (एकीकृत समाजवादी) सुदूरपश्चिम प्रदेश सभा संसदीय दलका नेता दीर्घ सोडारी नियुक्त भएका छन् ।

नेकपा एमाले, नेकपा माओवादी केन्द्र र नागरिक उन्मुक्ति पार्टीको समर्थनमा सोडारी मुख्यमन्त्रीमा नियुक्त भएका हुन्।

प्रदेश सभामा आफ्नो बहुमत रहेको दाबी पेस गरेपछि प्रदेश प्रमुख नजिर मियाँले सोडारीलाई मुख्यमन्त्रीमा नियुक्त गरेका हुन् ।

नागरिक उन्मुक्ति पार्टीका तर्फबाट कैलाश चौधरीले संसदीय दलको नेताको हैसियतले सोडारीलाई समर्थन भएको पत्रमा हस्ताक्षर गरेका छन्।​​

नाउपाकै अर्का सांसद घनश्याम चौधरीले पनि कीर्ते हस्ताक्षर भएको दाबी गरेका छन्।

नागरिक उन्मुक्ति पार्टीको संसदीय दलको नेता आफू रहेको दाबी गर्दै उनले सोडारीलाई गरिएको समर्थन गैरकानूनी रहेको बताए ।

'दलको नेता म हुँ। तर कैलाश चौधरीले आफू दलको नेता भएको भन्दै हस्ताक्षर गरेका छन्। यो विधिसम्मत छैन। हामीले प्रदेश प्रमुखलाई पनि जानकारी गराइसकेका छौं। कानूनी प्रक्रियामा अगाडि बढ्छौं', उनले भने।

प्रदेश सभामा चार सिट भएको एकीकृत समाजवादी पाँचौं दल हो।

१८ सांसदसहित नेपाली कांग्रेस पहिलो, ११ सांसदसहित माओवादी केन्द्र दोस्रो, १० सांसदसहित नेकपा एमाले तेस्रो र सात सांसदसहित नागरिक उन्मुक्ति चौथो दलका रुपमा प्रदेश सभामा रहेको छ।

यो बाहेक राप्रपाको तर्फबाट एक जना प्रदेश सभा सदस्य र स्वतन्त्रको उपस्थिति प्रदेश सभामा छ।