नेपाली कांग्रेसका सांसद एवं पूर्व मन्त्री दीपक खड्काले हडपेको नेपाल स्काउटको जग्गा र भवनमा प्रशासनले सिलबन्दी गरेको छ । 

नेपाल स्काउट, केन्द्रीय कार्यालयको लैनचौरस्थित ३ रोपनी जग्गा सिल गर्न बिहीबार राती पौने १० बजे प्रहरीसहित प्रशासनको टोली र जनप्रतिनिधिहरू लैनचौर पुगेर सिलबन्दी गरेका हुन् । 

स्काउटको जग्गा भाडामा लिएका सांसद खड्काले आसपासमा थप ९ रोपनी जग्गासमेत हडपेका थिए । स्काउटका जग्गा र भवन नियन्त्रणमा लिएका खड्काले १५ वर्षदेखि अन्य व्यापारिक संस्थालाई दिएर भाडा असुलिरहेका थिए । स्काउटको सम्पत्ति खाली गर्न अदालतले आदेश दिँदा पनि उनलाई यसअघि सरकारले हटाउन सकेको थिएन ।

सङ्खुवासभाबाट निर्वाचित सांसद् खड्कालाई स्काउटलाई फिर्ता गर्नु भनी पाटन उच्च अदालतले दुई वर्षअघि फैसला गर्दा पनि उनले अटेर गरेका थिए । स्काउटले जग्गा तथा भवन फिर्ता गराउन राष्ट्रपति, प्रधानमन्त्री, सभामुख, गृहमन्त्री, खेलकुदमन्त्री, सबै सांसद, संसदीय समितिहरू, काठमाडौँ महानगरपालिका, जिल्ला प्रशासन कार्यालय, प्रहरीलगायत राज्यका सबैजसो निकायलाई पत्राचार गरेर हारगुहार गरेको थियो । 

खड्का सञ्चालक रहेको श्री खड्का ल्यान्ड डेभलपमेन्ट प्रालिले स्काउटसँग २०६५ मा सम्झौता गरी ३ रोपनी जग्गा १० वर्षका लागि भाडामा लिएको थियो । सम्झौताको म्याद २०७५ मै सकिए पनि सम्झौताअनुसार भाडाबापतको ६ करोड ३० लाख १८ हजार रुपैयाँ भुक्तानी खड्काले भुक्तानी नगरेको स्काउटका निर्देशक रामप्रसाद भट्टराईले राज्यका सबैजसो निकायलाई लेखेको पत्रमा उल्लेख छ ।

खड्काको कम्पनीले ३ रोपनी जग्गा लिएको थियो । लगत्तै उनले आसपासको थप ९ रोपनी जग्गा १५ वर्षदेखि हडपेर दुरुपयोग गरिरहेको स्काउटले जनाएको छ । भाडामा लिएको ३ रोपनी जग्गामा खड्काले लैनचौर ब्यांकेट र माई च्वाइस रेस्टुरेन्टलाई भाडामा लगाएका छन् । आज प्रहरीसहितको टोलीले बैङ्केट र रेस्टुरेन्टमा सिलबन्दी गरेको स्काउटका राम प्रसाद भट्टराईले बताए । स्काउट र जनप्रतिनिधिको आग्रहमा सिलबन्दीका क्रममा प्रहरीले सहयोगी भूमिका खेलेको जिल्ला प्रहरी परिसर काठमाडौँका प्रमुख एसएसपी भूपेन्द्र खत्रीले बताए ।

यो पनि

जग्गा भाडामा दिँदा स्काउट पदाधिकारीकै जालझेल, सांसद खड्काको कम्पनीले तिरेन ६ करोड बक्यौता